293 mln teńge salyqtan jaltarǵan kúdikti BAÁ-den elge jetkizildi
ASTANA. KAZINFORM — Salyq tóleýden jaltarǵan kúdikti Birikken Arab Ámirlikterinen Qazaqstanǵa ekstradıtsııalandy, dep habarlaıdy Bas prokýratýranyń baspasóz qyzmeti.
Bas prokýratýra men Qarjylyq monıtorıng agenttiginiń qyzmetkerleri Birikken Arab Ámirlikterindegi Qazaqstan Elshiliginiń qoldaýymen salyq tóleýden jaltarǵany úshin qylmystyq jaýaptylyqqa tartý maqsatynda Qazaqstan azamaty elge jetkizildi. 2018-2020 jyldar aralyǵynda ol kommertsııalyq kásiporyn dırektory bola tura, korporatıvtik tabys jáne qosylǵan qun salyǵyn tóleýden jaltaryp, memleketke 293 mln teńgeden astam zalal keltirgen.
— Qylmysty jasaǵannan keıin kúdikti jasyrynyp, bir jyldan astam ýaqyt boıy halyqaralyq izdestirilýde boldy. Bıyl qyrkúıek aıynda ol Birikken Arab Ámirlikteri aýmaǵynda ustalyp, Qazaqstan Bas prokýratýrasynyń suraý salýy boıynsha quqyq qorǵaý organdaryna berildi. Qazirgi ýaqytta kúdikti tergeý ızolıatoryna qamaýǵa alyndy. Jasalǵan qylmystary úshin oǵan múlki tárkilene otyryp, bes jyldan segiz jylǵa deıingi merzimge bas bostandyǵynan aıyrý túrindegi jaza qarastyrylǵan, — dedi Bas prokýratýranyń resmı ókili Erlan Janpeıisov.
Eske salaıyq, aǵymdaǵy jyly Birikken Arab Ámirlikterinen 9 izdestirilip júrgen tulǵa ekstradıtsııalandy.