292,4 mln teńge syıaqy: «Báıterek» holdıngi basshylarǵa beriletin tólemderdi túsindirdi

NUR-SULTAN. QazAqparat - Áleýmettik jeliler men buqaralyq aqparat quraldarynda «Báıterek» UBH» AQ Dırektorlar keńesi men basqarma múshelerine beriletin syıaqy týraly málimetter taralyp jatyr. Osyǵan baılanysty holdıng atalǵan tólemderge túsinikteme beredi, dep habarlaıdy QazAqparat tilshisi.

Málim etilgendeı, «Memlekettik múlik týraly» QR Zańyna sáıkes holdıngtiń Dırektorlar keńesiniń quramyndaǵy memlekettik qurylymdar ókilderine syıaqy tólenbeıdi.

«Syıaqylar tek táýelsiz dırektorlarǵa ǵana tólenedi», - dep atap ótedi holdıngten.

Taratylǵan aqparatqa sáıkes, 2021 jyly «Báıterek» UBH» AQ (Basqarma) atqarýshy organynyń múshelerine 292,4 mln teńge mólsherinde syıaqy tólengen. Bul tólemder - Basqarma múshelerine 2021 jyl ishinde tólengen jalaqy men yntalandyrý aqylary. Bul jerde salyqtar ustalǵanǵa deıingi soma berilgen jáne kórsetilgen kezeń ishinde ózgergen Basqarmanyń 11 múshesi boıynsha tólemder, sondaı-aq 2021 jyly holdıngke qosylǵan «QazAgro» UBH» AQ-nyń atqarýshy organynyń múshelerine tólemder qamtylǵan.

«Aıta ketý kerek, barlyq tólemder 2021 jyly jumys istegen Dırektorlar keńesi men holdıng Basqarmasy múshelerine 2021 jyly tólendi. Bul tólemderdiń Dırektorlar keńesi men Basqarmanyń 2022 jyly jumysyn bastaǵan múshelerine qatysy joq», - deıdi «Báıterekten».