290 mln teńge salyqtan jaltarǵan kúdikti Reseıden Qazaqstanǵa qaıtaryldy
ASTANA. KAZINFORM — Kúdikti tergeý ızolıatoryna qamaldy. Kinási dáleldengen jaǵdaıda, oǵan 8 jylǵa deıin bas bostandyǵynan aıyrý jazasy taǵaıyndalýy múmkin.
QR Bas prokýratýrasy asa iri mólsherde salyq tóleýden jaltarǵan Qazaqstan azamatyn qylmystyq jaýaptylyqqa tartý úshin Reseıden ekstradıtsııalady.
Tergeý barysynda kúdikti 2022-2023 jyldary kommertsııalyq uıymnyń dırektory bolyp, kirister deklaratsııasyna burmalanǵan derekterdi engizý arqyly 290 mıllıon teńgeden astam somaǵa salyq tóleýden jaltarǵany anyqtaldy.
Osy qylmysty jasaǵannan keıin ol qylmystyq qýdalaý organynan jasyrynǵan, keıinnen halyqaralyq izdeýge jarııalanǵan. Bıyl qańtarda ol Krasnodar qalasynda ustalyp, QR Bas prokýratýrasynyń suraýymen elge ekstradıtsııalandy.
— Qazir kúdikti tergeý ızolıatoryna qamaldy. Oǵan taǵylǵan qylmys úshin belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp, 8 jylǵa deıin bas bostandyǵynan aıyrý jazasy kózdelgen, — delingen habarlamada.
Buǵan deıin Qazaqstanǵa 1 mlrd teńge zalal keltirgen kúdikti Reseıden ekstradıtsııalanǵany belgili boldy.
