29 jastaǵy qyzylordalyq 85 shaqyrym joldy júgirip ótti
QYZYLORDA. KAZINFORM — Qyzylordalyq áýesqoı sportshy Aqdáýlet Abat 85 shaqyrym joldy júgirip ótip, alǵashqy belesin baǵyndyrdy.
29 jastaǵy jelaıaq jedel járdem salasynda eńbek etedi. Ózi turatyn Jalaǵash aýdanynan 3 shilde kúni tańǵy saǵat tórttiń shamasynda shyqqan. Oblys ortalyǵyna 10 saǵat 12 mınýtta jetip, maqsatyn oryndady.
— Bizge ártúrli sebeppen shaqyrýlar túsedi. Sonyń ishinde entigý mazalaıtyndar kezdesedi. Ózim buǵan deıin gazdalǵan sýsyn men fastfýdty jıi tutynatynmyn. Sol kezdegi salmaǵym 94 kılogramm boldy. Naýqastardyń jaǵdaıyn kórgennen keıin munyń durys emestigin bilip, salaýatty ómir saltyna bet burdym. Sportpen shuǵyldanyp, júgirýdi qolǵa aldym. Sonyń arqasynda salmaǵym 78 kılogramǵa deıin tústi, ózimdi jeńil sezinemin. Al búgingi marafonym arqyly jastarǵa úlgi kórsetkim keldi, — dedi Aqdáýlet Abat.
Jelaıaq jigit ýltramarafonǵa 41 kún daıyndalǵan. Uzaq jolda Tereńózek kentiniń tusynda aıaǵy jaraqattanyp, jedel járdem shaqyrýǵa týra kelgen. Degenmen, jaǵdaıy ońalǵasyn júgirýdi jalǵastyrǵan. Abat Aqdáýlet óz jeńisin Aıkórkem esimdi qyzyna arnady.
— Endi bir aı demalyp, kúsh jınap alyp, Jalaǵash aýdanynan Almatyǵa deıin velosıpedpen jetkim keledi. Ol úshin de biraz daıyndyq kerek. Qazir sportty serik etken jastar az. Qatarlastaryma osy bastamam arqyly alynbaıtyn qamal joq ekenin dáleldeýdi maqsat etip otyrmyn, — dedi ol.
Buǵan deıin 80 jastaǵy astanalyq Ońtústik Afrıka astanasy Keıptaýnda ótken halyqaralyq marafonda baq synap, jaraqat alsa da, 42 shaqyrymdyq qashyqtyqty sońyna deıin baǵyndyrǵan edi.
