29 tamyzda Taıaý Shyǵysta ne boldy. Jańalyqtar toptamasy
ASTANA. KAZINFORM - 29 tamyz, beısenbi kúni Taıaý Shyǵysta Gaza sektoryndaǵy qaqtyǵys jáne Iran men Izraıl arasyndaǵy óńirlik shıelenis tóńireginde ne bolǵany týraly Kazinform tilshisiniń materıalynan oqyńyz.
- Izraıl qorǵanys Armııasy sársenbi kúni terrorızmge qarsy aýqymdy operatsııanyń bastalǵany týraly málimdegennen keıin Birikken Ulttar Uıymynyń Bas hatshysy Antonıý Gýterrısh Izraıldi Batys jaǵalaýdaǵy áskerı operatsııalardy toqtatýǵa shaqyrdy.
Gýterrıshtiń baspasóz hatshysy Stefan Dıýjarrık bas hatshynyń Batys jaǵalaýdaǵy sońǵy oqıǵalarǵa «qatty alańdaýshylyq bildiretinin» jáne «adamdardyń, sonyń ishinde balalardyń qaza bolýyn qatań aıyptaıtynyn» aıtty.
- Baıden ákimshiligi Izraıldi «Iordan ózeniniń batys jaǵalaýyndaǵy beıbit turǵyndardyń ómirin qorǵaý úshin barlyq sharalardy qabyldaýǵa» shaqyrdy.
«Biz Izraıldiń qaýipsizdik salasyndaǵy naqty qajettilikterin, sonyń ishinde Batys jaǵalaýdaǵy terrorıstik áreketterge qarsy turý qajettiligin moıyndaımyz. Sonymen birge biz Izraıl bıligi barlyq beıbit turǵyndardy qaýipten qorǵaý úshin tıisti shara qabyldaýyn talap etemiz», - delingen Memlekettik departament ókiliniń málimdemesinde.
Izraıl polıtsııasy men ShABAK málimetinshe, beısenbige qaraǵan túni Izraıl kúshteri Iordan ózeniniń batys jaǵalaýyndaǵy Týlkarm qalasyndaǵy meshitte jasyrynǵan bes palestınalyq sodyrdy óltirdi.
Málim bolǵandaı, Týlkarmda shekara polıtsııasynyń «ıAmam» lańkestikke qarsy bólimshesiniń jaýyngerleri olardyń ornalasqan jeri týraly jedel aqparat alǵannan keıin meshitti panalaǵan bir top sodyrmen shaıqasqa shyqqan. Áskerılerdiń aıtýynsha, atystan bes palestınalyq sodyr qaza taýyp, bir ızraıldik ofıtser jeńil jaralanǵan.
- Eýroodaqtyń syrtqy saıasat jónindegi basshysy Jozep Borrel múshe memleketterden «keıbir ızraıl mınıstrlerine» qarsy sanktsııalar engizgisi keletin-kelmeıtinin suraý protsesin bastaǵanyn aıtty.
Saıasatker sóz bolyp otyrǵan ızraıldik mınıstrlerdiń eshqaısysynyń atyn atamady, biraq kóptegen habarlarda olardyń arasynda Qarjy mınıstri Betsalel Smotrıch pen Ulttyq qaýipsizdik mınıstri Itamar Ben Gvırdiń aty ataldy.
Buǵan Irlandııanyń Syrtqy ister mınıstri reaktsııa bildirdi. Vedomstvo basshysy onyń eli Eýropalyq Odaqtyń syrtqy saıasat basshysy Jozep Borreldiń ásire ońshyl ızraıldik mınıstrlerge, sondaı-aq «eldi mekenderdiń keńeıýine yqpal etetin» Batys jaǵalaýdaǵy qonystandyrý uıymdaryna qarsy sanktsııalar engizý týraly usynysyn qoldaıtynyn aıtty.
— Izraıl áskerı ushaqtary Lıvannyń ońtústigindegi Kafr-Kılada Hezbolla paıdalanatyn ǵımarattarǵa soqqy berdi, dep habarlady Izraıl qorǵanys kúshteri.
Buǵan qosa, jaqynda Lıvannan ushyrylǵan jarylǵysh zattar tıelgen birneshe ushqyshsyz ushaq Golan jotalarynyń soltústigine qulady.
– AQSh-tyń ulttyq qaýipsizdik jónindegi keńesshisi Djeık Sallıvan Gaza sektorynda atysty toqtatý jáne kepilge alynǵandardy bosatý jónindegi kelissózder ilgerilegenin aıtty.
«HAMAS Gaza sektorynda jergilikti halyqty polıomıelıtke qarsy vaktsınatsııalaý úshin jeti kúndik gýmanıtarlyq bitimge kelisti», - dep habarlaıdy Londondaǵy arab tilindegi Al-Araby Al-Jadeed jańalyqtar saıty.
DDSU Izraıl Gaza sektorynda polıomıelıtke qarsy vaktsınatsııalaý naýqanyn júrgizý úshin shekteýli «gýmanıtarlyq úzilisterge» kelisti dep málimdedi.
Birikken Ulttar Uıymy Gaza sektoryndaǵy 640 myńǵa jýyq balaǵa ekpe salýǵa daıyndalyp jatyr. 23 tamyzda DDSU kem degende bir balanyń 2 tıpti polıomıelıt vırýsymen sal aýrýyna shaldyqqanyn rastady, bul aýmaqta sońǵy 25 jyldaǵy alǵashqy jaǵdaı.
