29 shilde — Halyqaralyq jolbarystar kúni
ASTANA. KAZINFORM — Qazaqstanda bir kezderi qazaq dalasynyń aıbynyna aınalǵan Turan jolbarysyn tarıhı mekenine qaıta jersindirý jumystary kezeń-kezeńimen júzege asyrylyp jatyr. Bul joba joıylyp ketken jyrtqyshty oraltýmen qatar, Іle-Balqash óńiriniń tabıǵı ekojúıesin qalpyna keltirýge baǵyttalǵan mańyzdy ekologııalyq bastama bolyp esepteledi.
Ekologııa jáne tabıǵı resýrstar mınıstrliginiń málimetinshe, Turan jolbarysy kezinde qazaq dalasyn erkin kezgen. Alaıda adam áreketiniń saldarynan jyrtqysh týǵan mekeninen birjola joıylyp ketken.
Qazirgi ýaqytta Qazaqstan Turan jolbarysyn tarıhı mekenine qaıtarý boıynsha halyqaralyq deńgeıdegi aýqymdy jobany júzege asyryp keledi. Onyń negizgi alańy — «Іle-Balqash» memlekettik tabıǵı rezervaty. Munda jolbarystyń ómir súrýine qolaıly tabıǵı orta qalyptastyrý, qorek qoryn kóbeıtý jáne bıoalýantúrlilikti saqtaý baǵytynda keshendi jumystar júrgizilip jatyr.
Joba aıasynda 2024 jyly Nıderlandtan alǵashqy Amýr jolbarystary jetkizilse, 2026 jyly Reseı Federatsııasynan taǵy birneshe daraq ákelindi.
Qazirgi ýaqytta rezervat aýmaǵyndaǵy arnaıy voler kesheninde jalpy sany alty jolbarys beıimdelý kezeńinen ótip jatyr. Bul — janýarlardy bolashaqta tabıǵı ortaǵa jiberýge daıyndyqtyń mańyzdy kezeńi.
— Jolbarys — jaı ǵana jyrtqysh emes. Ol — tabıǵattyń kúsh-qýatyn, erkindigin jáne ekojúıeniń saýlyǵyn bildiretin mańyzdy belgi. Jolbarys bar jerde tabıǵattyń tepe-teńdigi saqtalady, — delingen habarlamada.
Eske salaıyq, buǵan deıin Qaraǵandyda jańa týǵan amýr jolbarystaryna «Arystan patsha» keıipkerleriniń esimi berilgenin habarlaǵanbyz.
