29 sáýir kúni Astanada júgirýden qaıyrymdylyq jarysy ótedi
«Bolashaq» korporatıvtik qory qaıyrymdylyq júgiristi kóptegen seriktesterdiń qoldaýymen qoǵamnyń aýtızm týraly habardarlyǵyn arttyrý, aýtızmi bar adamdardyń ómir sapasyn jaqsartý jáne olardyń áleýmettenýi men óz qabiletterin iske asyrýǵa jaǵdaılardyń jasalýyn qamtamasyz etý maqsatymen ótkizedi. Jınalǵan qarajat aýtızmi bar jáne basqa da mentaldyq buzylýshylyqtary bar balalardy qoldaýǵa arnalǵan «Bolashaq» qorynyń «Ár bala mektepke barýǵa laıyqty» baǵdarlamasyna baǵyttalady.
Júgiris Dúnıejúzilik aýtızm máselesi týraly aqparatty taratý kúnine oraılastyrylǵan. Jyl saıyn sáýir aıy boıy aýtızm spektri buzylǵan adamdarǵa kómektesý úshin birqatar sharalar men aqparattyq-túsindirý naýqandary ótkiziledi.
Júgiris 1, 2,5, 5 jáne 10 shaqyrym qashyqtyqtary boıynsha ótedi. Qatysý quny 4 990 teńgeden 7 990 teńgege deıin. Júgirýge kásibı sportshylar, júgirýshiler, áýesqoı sportshylar, erekshe balalar jáne olardyń ata-analary men taǵy basqalar qatysady. Júgiris qonaqtary qatarynda Olımpıada chempıony, bokstan úsh dúrkin álem chempıony, bokstan úsh dúrkin Azııa chempıony Serik Sápıev, MMA jáne djıý-djıtsýdan bes dúrkin álem chempıony, QR eńbek sińirgen sport sheberi Aıdar Mahmetov, aýyr atletıkadan eki dúrkin álem chempıony, eki dúrkin Eýropa chempıony, Qazaqstan chempıony, Azııa jáne Azııa oıyndarynyń chempıony Svetlana Podobedova, sondaı-aq kúsh nómirleri boıynsha tórt dúrkin rekordsmen, Gınness kitabynyń rekordsmeni jáne Qazaqstannyń alty dúrkin rekordsmeni palýan Sergeı Tsyrýlnıkov bar.
Qaıyrymdylyq júgiris aıasynda aýtızm jáne damýynda basqa erekshelikteri bar balalar «Kóńildi starttar» oıyn-saýyq estafetasyna qatysa alady. Sonymen qatar baǵaly júldeler men syılyqtar: Apple iPhone 14Pro smartfondary, eresekterge jáne balalarǵa arnalǵan velosıpedter, «Oxy Fit&Gym» fıtnes-klýbyna jyldyq abonement, sondaı-aq Darmed klınıkasynda densaýlyqty tolyq tekserý oınatylady.
«Bolashaq» korporatıvtik qory uıymdastyrǵan «Run for autism» qaıyrymdylyq júgirisi Astana qalasy ákimdiginiń, NAK holdınginiń, «BF Mereke» qoǵamdyq qaıyrymdylyq qorynyń, «Astana Railways», «YDA» kompanııalarynyń, «SF» qazaqstandyq dámdi taǵamdar jelisi, «Astana Invest», «Myd Production» kompanııalarynyń, «G-life» eolordalyq sýy, NAURYZ HALF MARATHON, «Mır ravnyh vozmojnosteı» qorynyń, «TECHNODOM», «Tion» kompanııalarynyń, «Oxy Fit&Gym» fıtnes-klýbynyń, «Darmed» klınıkasynyń, sondaı-aq Qazaqstan sportshylar odaǵynyń jáne «Nomad Triathlon Club» qoldaýymen júrgiziledi.
Júgiristiń aqparattyq seriktesteri: QR Prezıdentiniń teleradıokesheni, «Sputnik Kazahstan» aqparattyq agenttigi, «NUR Media» medıaholdıngi, «Habar» agenttigi, «QazContent» aktsıonerlik qoǵamy, «Qazaq radıolary», «Sxodim Group» medıaholdıngi.
