29 naýryzda búkilálemdik «Jer ýaqyty-2014» sharasy ótedi
ASTANA. QazAqparat - 2014 jyldyń 29 naýryzynda búkil álemde «Jer ýaqyty-2014» ǵalamdyq sharasy jetinshi ret júzege asyrylmaq.
Bul týraly Búkilálemdik jabaıy tabıǵat qorynyń (WWF) saıtynda habarlanǵan.
Bıylǵy jylǵy sharanyń basty ereksheligi - árbir azamattyń naqty tabıǵatty qorǵaý sharalaryna atsalysa alýynda bolyp otyr. «Jer ýaqyty» - bul jer ǵalamsharyna qamqorlyq belgisi retinde bir saǵatqa álem boıynsha jer-jerlerde elektr qýatyn sóndirýge negizdelgen aktsııa. Oǵan ótken jyly dúnıe júziniń 150 elinen 2 mlrd.-qa jýyq adam qatysqan. Sharanyń aýqymdylyǵy jyldan-jylǵa artýda. Bizdiń elimizde ádette bul kúni mekemelerde, saýda ortalyqtarynda, mektepterde, kolledjder men ýnıversıtetterde jáne taǵy da basqa ǵımarattarda shamdar sóndiriledi. Atalmysh aktsııa aıasynda sharýashylyqtar men kommertsııalyq mekemeler de bir saǵatqa elektr qýatyn ajyratýǵa shaqyrylady. Aıta keteıik, «Jer ýaqyty» aktsııasy - Búkilálemdik jabaıy tabıǵat qorynyń jyl saıyn dástúrli túrde ótkizetin halyqaralyq is-sharasy.
