3,4 mlrd teńge jymqyrý isi: Túrkistanda mal sharýashylyǵyna bólingen qarjyǵa qatysty 27 adam sottaldy
TÚRKІSTAN. KAZINFORM – Túrkistan oblysy Kentaý qalalyq sotynda jeńildetilgen memlekettik baǵdarlama aıasynda mal sharýashylyǵyn damytýǵa bólingen nesıe qarajatyn asa iri mólsherde jymqyrý deregi boıynsha aıyptalǵan 27 adamǵa qatysty qylmystyq is qaraldy.
Sot anyqtaǵandaı, sottalýshylar aldyn ala sóz baılasý arqyly mal basyn kóbeıtýge arnalǵan jeńildetilgen memlekettik baǵdarlama boıynsha berilgen nesıeler men sýbsıdııany alaıaqtyq jolmen ıemdengen.
– Іs materıaldaryna sáıkes, nesıe boıynsha memleketke keltirilgen shyǵyn kólemi – 2 mlrd 950 mln 721 myń 814 teńge. Onyń 206 mln 751 myń 814 teńgesi ótelgen. Budan bólek sýbsıdııa boıynsha keltirilgen shyǵyn 508 mln 223 myń 243 teńge bolǵan, – dep habarlady oblystyq sot.
Prokýror sottalýshylardy kináli dep tanyp, olardyń árqaısysyna 6 jyldan 12 jylǵa deıin bas bostandyǵynan aıyrý jazasyn taǵaıyndaýdy surady. Al sottalýshylar taǵylǵan aıyppen kelispeı, nesıe qarajatyn memlekettik baǵdarlama aıasynda alǵandaryn aıtyp, ózderin aqtaýdy ótindi.
Sot úkimimen 6 sottalýshyǵa 6 jyl 6 aı merzimge bas bostandyǵynan aıyrý jazasy taǵaıyndaldy. Al qalǵan 2 sottalýshy 5 jyl 6 aıǵa, 18 sottalýshy 5 jylǵa, 1 sottalýshy 3 jylǵa bas bostandyǵynan aıyrý jazasyna kesildi.
– 13 sottalýshynyń múlki memleket kirisine tárkilendi. Sondaı-aq kámeletke tolmaǵan balalary bar 7 sottalýshyǵa qatysty taǵaıyndalǵan jaza belgili bir merzimge keıinge qaldyryldy, – delingen sot habarlamasynda.
Sonymen qatar sot «Agrarlyq nesıe korporatsııasy» AQ men Túrkistan oblysy aýyl sharýashylyǵy basqarmasynyń materıaldyq zalaldy óndirý týraly azamattyq talap qoıýlaryn qanaǵattandyrý quqyǵyn tanyp, zalal mólsherin azamattyq sot isin júrgizý tártibimen qaraýǵa joldady.
Úkim zańdy kúshine engen joq.
Buǵan deıin Túrkistanda mal sharýashylyǵyn damytýǵa bólingen 271 mln teńge sýbsıdııa qoldy bolǵanyn jazǵan edik
