29 maýsymda álemdik naryqtaǵy munaı baǵasy qandaı
ALMATY. KAZINFORM — Álemdik munaı naryǵynda baǵa qaıtadan óse bastady.
29 maýsymdaǵy málimetke sáıkes, Brent markaly munaıdyń tamyz aıyndaǵy fıýchersteri 0,48 dollar qymbattap, bir barreli 72,47 dollar boldy.
Al amerıkalyq WTI markaly munaıdyń baǵasy 0,82 dollar ósti, barreli — 70,05 dollar.
Reseılik Urals markaly munaı da qymbattap, baǵasy 1,28 dollar ósip, bir barreli 60,11 dollar shamasynda saýdalanyp jatyr.
Eske salaıyq, buǵan deıin munaı baǵasy Parsy shyǵanaǵyndaǵy shıelenis bastalǵanǵa deıingi deńgeıge deıin tómendegen edi. Buǵan AQSh pen Irannyń 17 maýsymda ózara túsinistik týraly memorandýmǵa qol qoıýy áser etti. Osy jańalyqtan keıin naryq qatysýshylary Ormýz buǵazy arqyly munaı tasymalyna qaýip tónbeıdi degen senimge kelip, munaı baǵasyna qysym azaıdy.
Eske salaıyq, 24 maýsymda AQSh Kongresiniń Senaty Vashıngton ákimshiligin Iranǵa qarsy áskerı is-qımyldardy toqtatýǵa shaqyratyn qarar qabyldady.
Alaıda 26-27 maýsymda jarııalanǵan bitimge qaramastan, AQSh pen Iran arasyndaǵy áskerı qaqtyǵys qaıta ýshyǵyp, taraptar bir-birine soqqy jasady.
AQSh áskeri Ormýz buǵazynda júk kemesine jasalǵan shabýylǵa jaýap retinde Irannyń áskerı nysandaryna soqqy berdi.
Keıin taraptar 30 maýsymǵa deıin atysty toqtatý rejımin saqtaýǵa ýaǵdalasty. Osy kúni Qatarda Ormýz buǵazy arqyly keme qatynasynyń qaýipsizdigi máselesi talqylanýǵa tıis
