29 qyrkúıekte Qazaqstanda ótetin mańyzdy sharalar tizbesi
ASTANA. QazAqparat - «QazAqparat» halyqaralyq aqparat agenttigi 29 qyrkúıek kúni ótetin Qazaqstandaǵy mańyzdy oqıǵalarǵa sholýdy usynady.
Astana Leisure qazaqstandyq halyqaralyq týrıstik kórmesi aıasynda Mańǵystaý oblysynyń týrızm basqarmasy Astanada Mangystau Tourism Workshop - 2017 sharasyn ótkizedi. Onyń barysynda óńirdegi týrızm ındýstrııasyndaǵy kóshbasshy kompanııalar týrlardy uıymdastyrý boıynsha ózderiniń erekshe qyzmetterin tanystyrady.
Saǵat 09:30-da Astanadaǵy № 9 emhanasynda ımmýnızatsııa máseleleri men tumaýǵa qarsy ekpe jasaý sharalarynyń bastalýyna arnalǵan baspasóz máslıhaty ótedi dep kútilýde. Oǵan QR Densaýlyq saqtaý vıtse-mınıstri Alekseı Tsoı men Bas memlekettik sanıtarlyq dáriger Jandarbek Bekshın qatysady. Mamandar vaktsınalaýdan bas tartýdyń sebepteri men onyń saldary jaıynda málimetter beredi.
Saǵat 10:00 kezinde elordadaǵy Astana Marriott Hotel-de Qazaqstan Respýblıkasy ІІM, Belarýs Respýblıkasy TJM jáne Reseı TJM Birlesken alqasynyń V otyrysy bastalady. Otyrysqa atalǵan vedomstvolardyń mınıstrleri qatyspaq. Jıynda halyqty tótenshe jaǵdaılardan qorǵaýdyń ózekti máseleleri talqyǵa salynady.
Saǵat 11:00-de Ádilet mınıstrliginde memlekettik organdardyń, úkimettik emes sektor men bıznes qoǵamdastyqtyń qatysýymen Zań jobalaý qyzmeti máseleleri jónindegi vedomstvoaralyq komıssııanyń kezekti otyrysy ótedi. Jıyn barysynda zań jobasynyń 2 tujyrymdamasyn, 2018 jylǵa arnalǵan Úkimettiń zań jobalaý josparynyń jobasyn qarastyrý eskerilgen.
Budan bólek, saǵat 12:20 kezinde Astanada Ortalyq kommýnıkatsııalar qyzmetinde Qazaqstandaǵy elektr energetıkasyn damytýdyń ózekti máselelerine arnalǵan baspasóz máslıhaty ótedi. «KEGOC» AQ Basqarma tóraǵasy Baqytjan Qajıev salany damytýdyń baǵyttary men energetıka aldynda turǵan ózekti máseleler jaıynda egjeı-tegjeıli baıandap beretin bolady.
29 qyrkúıekte tústen keıin «Nur Otan» partııasy Astana qalalyq fılıaly partııalyq tyńdaý ótkizedi. Kúntártibine 2016-2020 jyldarǵa arnalǵan elordany damytýdyń baǵdarlamasyn júzege asyrý aıasynda qaladaǵy kóliktik keshendi jańǵyrtý taqyryby shyǵarylyp otyr. Partııalyq tyńdaý QR Ulttyq akademııalyq kitaphanasynda ótedi.
Saǵat 15:00-de «Alataý» sport kesheni aýmaǵynda ózin-ózi qorǵaý men jas urpaqtyq moraldyq qasıetterin nyǵaıtýǵa arnalǵan ashyq shara uıymdastyrylady. Osy oraıda sharaǵa kelgender sambodan úzdik mamandarmen pikir almasa alady, sonymen qatar ózin-ózi qorǵaýdyń erekshe tásilderimen tanysýǵa múmkindik jasalady.
29 qyrkúıekte keshke qaraı «Astana Opera» kameralyq zalynyń sahnasynda «Mýzykalyq dáýirler dıalogy» atty kontsert bastalady. Onda halyqaralyq konkýrstardyń laýreaty Ernar Nurtazın (fortepıano) óner kórsetetin bolady.
Búgin «Ulttyq kod jáne jahandaný dáýirindegi sáıkestik» taqyrybynda Qazaqstan halqy Assambleıasy ǵylymı-sarapshylyq keńesiniń otyrysy ótedi. Sharany QHA, QR Prezıdenti janyndaǵy «Qoǵamdyq kelisim» RMM uıymdastyryp otyr. Forým Astanadaǵy Nazarbaev Ýnıversıtetinde ótkiziledi.
