29 qazan Jalpyulttyq aza tutý kúni bolyp jarııalanady
Qasym-Jomart Toqaev Qaraǵandy oblysyndaǵy Kostenko shahtasynda qaıǵyly oqıǵa saldarynan qaza tapqan kenshilerdiń otbasylarymen jáne týǵan-týystarymen kezdesip, kóńil aıtty, dep habarlaıdy Aqordanyń baspasóz qyzmeti.
Prezıdent apattyń mán-jaıyn anyqtaý, kenshilerdi qutqarý jáne zardap shekkender men qaza tapqandardyń otbasylaryna shuǵyl kómek kórsetý jóninde qajetti sharalar qabyldanatynyn jetkizdi.
Memleket basshysy erteń, ıaǵnı 29 qazandy elimizde Jalpyulttyq aza tutý kúni dep jarııalaıtynyn aıtty.
Qaraǵandy oblysyndaǵy Kostenko atyndaǵy shahtada bolǵan órtten qaza tapqan kenshiler sany 21-ge jetti, 23 kenshi áli de jer astynda.
Qazaqstan Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi.
Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa quryldy. Sondaı-aq, «ArselorMıttalTemirtaý» kompanııasymen ınvestıtsııalyq yntymaqtastyqty toqtatý tapsyryldy.
Shahtadaǵy órt faktisi boıynsha Qylmystyq Kodekstiń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý» baby boıynsha sotqa deıingi tergep-tekserý bastaldy.
Professor H.J. Maqajanov atyndaǵy aýrýhanalarǵa 18 adam jetkizildi. Bir adam reanımatsııada jatyr.
Memleket basshysynyń tapsyrmasyna sáıkes Premer-Mınıstr Álıhan Smaıylovtyń tóraǵalyǵymen apattyń sebepterin tergeý jáne onyń saldaryn joıý jónindegi Úkimettik komıssııa quryldy.
Onyń quramyna Premer-Mınıstrdiń birinshi orynbasary Roman Sklıar, tótenshe jaǵdaılar mınıstri Syrym Sháriphanov, ishki ister mınıstri Erjan Sádenov, densaýlyq saqtaý mınıstri Ajar Ǵınııat, eńbek jáne halyqty áleýmettik qorǵaý mınıstri Svetlana Jaqypova, ónerkásip jáne qurylys mınıstri Qanat Sharlapaev, quqyq qorǵaý organdarynyń, Qaraǵandy oblysy ákimdiginiń, eńbek ınspektsııasynyń, «Qorǵaý» kómir óndirýshiler kásipodaǵynyń ókilderi jáne t.b. kirdi.
Sondaı-aq, Úkimet «ArselorMıttal Temirtaý» AQ aktsıonerlerimen aldyn ala ýaǵdalastyqqa qol jetkizilgenin jáne kásiporynnyń menshik quqyǵyn Qazaqstan Respýblıkasynyń paıdasyna berý týraly kelisimshartty rásimdeý aıaqtalý ústinde ekendigin habarlady.
