29 qarashaǵa arnalǵan aýa raıy boljamy - Qazgıdromet
ASTANA. 28 qarasha. QazAqparat - Erteń Qazaqstan aýmaǵynyń basym bóliginde atmosferalyq aǵyndardyń ótýine baılanysty keı jerlerde jańbyr jaýady dep kútilýde, kóktaıǵaq bolady, tuman túsedi, jel kúsheıedi. Bul týraly «Qazgıdrometke» silteme jasap, QR TJM baspasóz qyzmetinen habarlaıdy.
Aqmola oblysynda 15-20 m/s jel soǵady, keı jerlerde jel ekpini 25 m/s bolady. Qostanaı, Soltústik Qazaqstan oblysynda túnde keı jerlerde, kúndiz Qazaqstan aýmaǵynyń basym bóliginde jel 17-22 m/s-ke kúsheıedi, keı jerlerde tuman túsedi, kóktaıǵaq bolady. Ońtústik Qazaqstan, Qyzylorda, Mańǵystaý, Pavlodar oblystarynda keı jerlerde jel 15-20 m/s-ke kúsheıedi. Aqtóbe, Jambyl oblystarynyń birqatar aımaqtarynda tuman túsedi, jel 15-22 m/s-ke kúsheıedi, Aqtóbe oblysynda keı jerlerde kóktaıǵaq bolady. Atyraý, Batys Qazaqstan, Qaraǵandy oblystarynda keıbir jerlerinde tuman túsýi yqtımal, kóktaıǵaq bolady kúndiz jel 15-20 m/s-ke kúsheıedi. Almaty oblysynda túnde jáne tańerteń tuman túsedi dep kútilýde, Jalańashkól aýdanynda jel 15-20 m/s-ke kúsheıedi, jel ekpini 25 m/s bolýy múmkin. Kúndiz Shyǵys Qazaqstan oblysynda keı jerlerde jel 15-20 m/s-ke kúsheıedi.
Jaqyn táýlikterde Qazaqstannyń soltústik bóliginiń kóptegen ózenderinde muz qalyptasý úrdisi jalǵasady. Batys Altaıdyń (ShQO) jekelegen ózenderinde muz qalyptasýyna jáne jaýyn-shashyn bolady dep kútilýine baılanysty sý deńgeıi kóterilýi múmkin. Qyzylorda oblysynyń aýmaǵynda Syrdarııa ózeninde ózen arnalaryn retteý esebinen sý deńgeıiniń turaqsyzdyǵy baıqalady. Respýblıkanyń ońtústigi jáne ońtústik-shyǵysynyń sý nysandarynda joǵary temperatýra aıasynda sý jylynady dep kútilýde, Almaty oblysynyń jekelegen ózenderinde muzdy qubylystar álsireıdi.
