28,54 °C: Jerorta teńiziniń temperatýrasy 90 jyldyq tarıhı rekordty jańartty
ASTANA. KAZINFORM – 13 tamyzda Jerorta teńiziniń búkil aýmaǵyndaǵy jerústi sýynyń ortasha temperatýrasy 28,54 gradýsqa jetip, keminde 1940 jyldan bergi eń joǵary kórsetkish tirkeldi. Bul týraly Ispanııanyń memlekettik meteorologııalyq qyzmeti habarlady, dep jazdy Euronews.
Mamandardyń aıtýynsha, tamyz aıy boıy Jerorta teńiziniń temperatýrasy kún saıyn derlik rekord jańartyp otyrǵan. Buǵan deıin Mercator Ocean International uıymy shilde aıynyń Jerorta teńizindegi baqylaý tarıhyndaǵy eń ystyq aı bolǵanyn málimdegen. Sol kezde sýdyń ortasha temperatýrasy 27,07 gradýsqa jetip, 2025 jylǵy shildedegi 26,68 gradýstyq rekordtan asyp tústi.
Jerorta teńizindegi anomaldy jylyný birneshe aıdan beri jalǵasyp keledi. Maýsym aıynyń ózinde sý temperatýrasy normadan 2,6 gradýs joǵary bolǵan. Ol kezde teńizdegi temperatýra ádette tamyzdyń ekinshi jartysynda ǵana baıqalatyn deńgeıge jetken.
Bul qubylys tek Jerorta teńizine tán emes. Bıyl shildede álemdik muhıt betiniń ortasha temperatýrasy 21 gradýsqa jetip, baqylaý tarıhyndaǵy eń joǵary kórsetkish tirkeldi. Jerorta teńizi aýmaǵynyń 27 paıyzynda shilde 1993 jyldan bergi eń ystyq aı boldy.
Mamandar teńizdegi rekordtyq temperatýrany qurlyqtaǵy aptaptyń tikeleı sebebi dep qarastyrýǵa bolmaıtynyn atap ótedi. Degenmen jyly sý jaǵalaýdaǵy aýa temperatýrasyna áser etedi: teńiz jylýdy qurlyqqa qaraǵanda baıaý joǵaltatyndyqtan, túngi salqyndaýdy tejep, aýa ylǵaldylyǵyn arttyrady jáne jaǵalaýdaǵy túnderdiń ystyq bolýyna yqpal etedi.
Teńizdegi uzaq ýaqytqa sozylǵan jylý ekojúıelerge de qaýip tóndiredi. Temperatýranyń joǵarylaýy belgili bir jaǵdaıǵa beıimdelgen teńiz organızmderine stress túsirip, keıbir túrlerdiń taralý aımaǵyn ózgertip, qyrylýyn arttyrýy múmkin.
13 tamyzdaǵy jańa kórsetkish Jerorta teńiziniń birneshe apta buryn ǵana jańartylǵan rekordyn taǵy da basyp ozǵanyn kórsetti.
Aıta keteıik, jýyrda BUU aptap ystyq pen tabıǵı apattar kúsheıýi múmkin ekenin eskertti.
Al Frantsııadaǵy aptap ystyq pen qurǵaqshylyqtyń saldarynan 50 óńirde dabyl jarııalandy.
