280 myńǵa jýyq qostanaılyq COVID-19 vaktsınasyn aldy

QOSTANAI. QazAqparat – Qostanaı oblysynda halyqtyń 55%-dan astamy koronavırýs ınfektsııasyna qarsy vaktsına aldy. Bul týraly oblystyq densaýlyq saqtaý basqarmasy málim etti, dep habarlaıdy QazAqparat tilshisi.

Vaktsınalaýǵa birinshi jáne ekinshi komponentti salyp otyratyn kabınetteri bar 31 medıtsınalyq uıym jumyldyryldy. Vaktsınalaýdy 181 statsıonarlyq jáne kóshpeli ekpe pýnktteri júzege asyrady.

«Búgingi kúni oblysqa vaktsınanyń birinshi komponentiniń 346 655 dozasy, ekinshi komponentiniń 285 385 dozasy jetkizildi. 277,8 myń adam nemese halyqtyń 55%-y vaktsına saldyrdy. Ekinshi komponentti alǵandar úlesi – 42,7%, ıaǵnı 215,4 myń adam», - dep málimdedi vedomstvodan.

Vaktsınalaýdy arnaıy oqytylǵan 426 medıtsınalyq qyzmetker jasaıdy.

Bir kún buryn Qostanaı oblysyna Sinopharm vaktsınasynyń 43 myń dozasy jetkizilgen bolatyn.

Avtory Janna Musabaeva