280 mln para alǵan Taldyqorǵan qalasy bilim bóliminiń basshysy sottaldy
TALDYQORǴAN. KAZINFORM – Osy jyldyń 17 shildesinde Jetisý oblysynyń Qylmystyq ister jónindegi mamandandyrylǵan aýdanaralyq soty Taldyqorǵan qalasynyń bilim bóliminiń basshysy J.Joldyhanovqa qatysty úkim shyǵardy.
Sybaılas jemqorlyqqa qarsy is-qımyl agenttiginiń málimetinshe, ol bıýdjet qarajatyn jymqyrý faktilerin jasyrǵany jáne jumystan bosatpaǵany úshin osy bólimniń bas býhgalterinen 280 mln teńge kóleminde para alǵany úshin kináli dep tanyldy. J.Joldyhanov 11 jylǵa bas bostandyǵynan aıyryldy jáne ómir boıy memlekettik qyzmette qyzmet atqarý quqyǵynan aıyryldy. Aldyn alý sharalary aıasynda tyńdaýlar sottalǵan ujymnyń qatysýymen ótti.
Úkim zańdy kúshine engen joq.
«Jetisý oblysynda sybaılas jemqorlyqqa qarsy qyzmet uıymdasqan qylmystyq top qurý jáne oǵan bıýdjet qarajatyn jymqyrý maqsatynda qatysý faktisi boıynsha Taldyqorǵan qalasynyń bilim bóliminiń laýazymdy tulǵalaryna qatysty buryn bastalǵan tergeýdi aıaqtaǵanyn eske salamyz. Turaqty uıymdasqan qylmystyq top 2020 jyldyń qańtary men 2023 jyldyń naýryz aralyǵynda Taldyqorǵan qalasynyń aýmaǵynda quqyqbuzýshylyq is-árekettermen aınalysty. Olar júıeli túrde bilim berý salasynda naqty jumys istemegen jeke tulǵalarǵa, sondaı-aq ózderiniń jeke shottaryna jalaqy aýdarý arqyly bıýdjet qarajatyn jymqyrdy», - delingen habarlamada.
Qylmystyq áreketterdiń nátıjesinde memleketke 4,3 mlrd teńge kóleminde zalal keltirildi. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.
