28 jyl buryn áskerge attanǵan atyraýlyq Almaty oblysynan tabyldy

ATYRAÝ. KAZINFORM – Atyraý oblysynan 28 jyl buryn áskerge attanǵan jigit Almaty oblysynan tabyldy.

Bul derekti Qyzylqoǵa aýdandyq máslıhatynyń depýtaty Esenbaı Nurov rastady. 

«Bizdiń aýdandaǵy Oıyl aýyldyq okrýginiń ortalyǵy – Jasqaırat aýylynan Beıbit Qozybaev 1996 jylǵy kúzde áskerge shaqyrylǵan edi. Sol kezde men aýdandyq qorǵanys isteri jónindegi bólimniń basshysy edim. Ol bastapqyda Batys Qazaqstan, keıin Mańǵystaý oblysyndaǵy áskerı bólimde boryshyn ótegen. Biraq, keıin otbasyna oralmaı, habar-osharsyz ketti. Onyń mundaı qadamǵa ne sebepten barǵany belgisiz. Anasy Marjan apaı aýdandyq qorǵanys isteri jónindegi bólimge aı saıyn kelip, ulynyń habaryn bilip berýdi jıi suraıtyn edi. Balasyn bir kórýdi ańsaǵan ana «Barmysyń, baýyrym» baǵdarlamasy arqyly da izdeý saldy», -deıdi Esenbaı Nurov. 

Onyń aıtýynsha, 28 jyl buryn áskerge attanǵan Beıbit Qozybaev 1977 jyly týǵan. Jaqynda ol synyptastarymen TikTok jelisi arqyly baılanysqa shyqqan. 

«Bul jańalyqqa bárimiz qýandyq. Ásirese, anasynyń, týystarynyń qýanyshynda shek joq. Ony áskerge shaqyrǵan meniń de moınymnan aýyr júk túskendeı boldy. Qazir Beıbit Qozybaev Almaty oblysyndaǵy Baıserke aýylynda turady eken. Úılengen, 4 balasy bar. Osy kezge deıin habar-osharsyz júrgeni úshin Beıbitti kinálaýdyń jóni joq. Ómirde túrli jaıt bolýy múmkin. Eń bastysy, ol aman-esen tabyldy. Anasy Marjan apaı Baıserke aýylyna baryp, ulymen kezdesti. Beıbitti mańdaıynan ıiskep, qushaǵyna basty. Sarǵaıǵan saǵynyshyn basty», -deıdi Esenbaı Nurov. 

Eske sala ketelik, budan buryn úsh myńǵa jýyq sarbaz Jaıyq jaǵalaýynda bóget salyp júrgenin jazǵan bolatynbyz.