28 jeltoqsan kúni eldiń basym bóliginde boran bolady
ASTANA. QazAqparat - Sınoptıkter Qazaqstanda 28 jeltoqsan kúni bolatyn aýa raıy týraly aıtty, dep habarlaıdy QazAqparat.
«Qazgıdromet» RMK-nyń málimetteri boıynsha, atmosferalyq frontaldy bólikterdiń ótýine baılanysty respýblıkanyń basym bóliginde qar jaýady. Tek eldiń ońtústigi men ońtústik batysynda qar jaýmaıdy. Respýblıkanyń basym bóliginde boran, kóktaıǵaq bolyp, tuman túsip, jel kúsheıedi.
Shyǵys Qazaqstan oblysynyń keı jerlerinde boran, kóktaıǵaq bolyp, jeldiń kúshi sekýndyna 15-20 metrge, ekpini 25 metrge jetedi.
Jambyl oblysynyń birqatar aımaqtarynda tuman túsip, kóktaıǵaq bolyp, jel sekýndyna 15-20 metrge deıin kúsheıedi. Túnde jeldiń ekpini 23 m/s bolady.
Qostanaı, Soltústik Qazaqstan, Aqmola oblystarynda tuman túsip, boran, kóktaıǵaq bolyp, jel sekýndyna 15-20 metrge deıin kúsheıedi.
Pavlodar, Qaraǵandy oblystarynyń keı jerlerinde tuman túsip, boran soǵyp, jeldiń jyldamdyǵy 15-20 m/s bolady.
Almaty, Qyzylorda, Atyraý, Batys Qazaqstan, Aqtóbe oblystarynyń keı jerlerinde tuman túsip, kóktaıǵaq bolady.
Ońtústik Qazaqstan oblysynyń birqatar aımaqtarynda tuman túsedi.
Mańǵystaý oblysynda jeldiń jyldamdyǵy sekýndyna 15-20 metr bolady dep kútilýde.
