28 jastaǵy jigitti óltirgen Sátpaev turǵyny 10 jylǵa qamaldy

SÁTBAEV. QazAqparat - Sátbaev qalalyq sotynda 28 jastaǵy jigittiń ólimine qatysty is boıynsha sot úkimi shyqty. Sot aıyptalýshyny kináli dep tanyp, 10 jylǵa bas bostandyǵynan aıyrý jazasyn taǵaıyndady, dep habarlaıdy QazAqparat tilshisi.

«Sottalýshy QR QK-niń 106-babynyń 3-bóligi «Abaısyzda adam ólimine ákep soqqan densaýlyqqa qasaqana aýyr zııan keltirý« boıynsha kináli dep tanylyp, 9 jylǵa bas bostandyǵynan aıyryldy. Sondaı-aq, osy merzimge QR QK 106-babynyń 1-bóligi boıynsha qylmys jasaǵany úshin buryn ótelmegen merzim qosyldy. Sottalýshyǵa qaýipsizdigi ortasha QAJ mekemesinde jazasyn óteýmen 10 jyl bas bostandyǵynan aıyrý jazasy taǵaıyndaldy», - dep sýdıa Dáýren Ibraev úkim shyǵardy.

Sottalýshy óz kinásin moıyndap, qaıtys bolǵan jigittiń týystarynan keshirim surady. Biraq, marqum Dáýlet Altynbekovtiń týystary sot úkimimen kelispedi. Olar sottalýshyny QR QK-niń 99-baby «Kisi óltirý» boıynsha sottaý kerek dep esepteıdi. Marqumnyń ápkesi Nyshanqul Topshaq sottalýshynyń buǵan deıin de jazaǵa tartylǵanyn, biraq jazasyn sońyna deıin ótemeı qaıta qylmys jasaǵanyn alǵa tartady. Іnisiniń jambas arterııasynan jaraqattanyp, qansyrap qaıtys bolǵanyn aıtady.

Sonymen qatar, sýdıa Sátbaev qalasynyń prokýratýrasyna sotqa deıingi tergeý satysynda qarama-qaıshy aıǵaqtar bergeni úshin kýágerlerdiń birin jaýapqa tartý týraly jeke qaýly shyǵardy.

Sot úkimi áli zańdy kúshine engen joq.

Esterińizge sala keteıik, ótken jyldyń qarasha aıynda Sátbaev qalasyndaǵy dámhanalardyń birinde 28 jastaǵy Dáýlet Altynbekov qaıtys boldy. Janjal kezinde tanysy ony pyshaqpen jaraqattaǵan.