28 shildede Almaty taýlarynda sel júrý qaýpi bar - TJD eskertý jarııalady
ALMATY. QazAqparat - Almaty taýlarynda sel qaýpi joǵary dep jarııalandy. Osyǵan baılanysty tótenshe jaǵdaılar departamenti turǵyndarǵa taýǵa shyqpaýǵa keńes berdi, dep habarlaıdy QazAqparat tilshisi.
«Qazgıdromet» taratqan eskertý negizinde Almatynyń Tótenshe jaǵdaılar qyzmeti turǵyndarǵa taýǵa shyqpaýǵa keńes beredi. 28 shilde kúni taýly aımaqtarda jáne qalada nóser jańbyr jaýyp, naızaǵaı oınaıdy, burshaq pen daýyl turady dep kútiledi.
«Sońǵy 13 kúnde qalyptasqan aýa temperatýrasynyń joǵarylaýyna baılanysty, Almaty taýlarynda glıatsıaldy (muzdyq) jáne nóserli sıpattaǵy sel qaýpiniń joǵary dárejesi baıqalady. Gıdrometeorologııalyq jáne sel jaǵdaıynyń taldaýyna sáıkes, qatty jańbyr jaýǵan kezde sel júrýi múmkin», - delingen resmı habarlamada.
Osyǵan baılanysty Almatyda ornalasqan qutqarý bólimsheleri, qalalyq azamattyq qorǵaý qyzmetteri, aýdandyq ákimdikter, azamattyq qorǵaý qyzmetteriniń avarııalyq-qutqarý, ınjenerlik tehnıkasy joǵary daıyndyq rejımine keltirildi.
Al Qazseldenqorǵaý bólimsheleri sel qaýpi bar ýchaskelerde baqylaýdyń jedeldetilgen rejımine aýystyrylyp, aerovızýaldy jáne jergilikti baqylaý júrgizilýde, ınjenerlik-tehnıkalyq qyzmetkerlerdiń táýlik boıy kezekshiligi uıymdastyryldy.
«Qurmetti týrıster, Almaty qalasynyń turǵyndary men qonaqtary. Sel tasqynyna qalyp qalǵan jaǵdaıda, qutqarylýǵa múmkindik joq. Sel tasqyny qaýpine baılanysty Іle Alataý taýlaryna barmaýdy suraımyz», - dep eskertti departament ókilderi.
Sel qaýpi bar jerlerde ne isteý kerek:
- taýdaǵy jaǵdaı týraly BAQ habarlaryn únemi qadaǵalap otyrý;
- eger qaýip tónse nemese kenetten sel júrse, releftiń eń bıik núktesine kóterilý;
- sel qaýpi bar kanaldardyń janynda, kól kópirlerinde (bógetterde) jáne olardyń astynda shatyr tikpeý, demalýǵa aıaldamaý.
