2,8 mlrd teńge alǵan: Mańǵystaýda 300-deı adamdy san soqtyrǵan alaıaqtardyń jazasy qatańdatyldy
AQTAÝ. KAZINFORM – Mańǵystaý oblysynda 294 adamdy aldap, 2,8 mıllıard teńge shyǵyn keltirgen eki kúdiktige qatysty apellıatsııalyq sot ótip, olardyń jazasy aýyrlatyldy.
Atalǵan is boıynsha apellıatsııalyq sot 2 sottalýshynyń jaza merzimderin uzartty.
Mańǵystaý oblystyq soty A. men B.-ge qatysty úkimdi, prokýrordyń ótinishhaty, sottalýshy men onyń advokaty jáne jábirlenýshiler ókiliniń apellıatsııalyq shaǵymdary negizinde apellıatsııalyq alqada isti qaraǵan.
Prokýror A. men B.-ny QK-niń 262-babymen aqtaý negizsiz dep, birinshi satyly sottyń úkimin buzyp, tergeý organy taqqan aıyppen kináli dep tanyp, múlikterin tárkileı otyryp, A.-ǵa túpkilikti 13 jyl, B.-ǵa 10 jyl merzimge bas bostandyǵynan aıyrý jazasyn taǵaıyndaýdy suraǵan.
Jábirlenýshilerdiń ókili prokýrordyń shaǵymyna uqsas ýáj keltirip, A. men B.-nyń jaza merzimderin uzartýdy surady.
Al, sottalǵan A. men B. jáne olardyń advokattary birinshi satyly sottyń úkimin buzyp, bas bostandyǵynan aıyrmaıtyn jaza taǵaıyndaýdy suraǵan.
Appellıatsııalyq sot alqasy birinshi saty sotynyń úkimin buzyp, jańa aıyptaý úkimin qabyldandy.
Soǵan sáıkes, A. QK-niń 262-babynyń 1-bóligimen, 190-babynyń 4-bóliginiń 1,2) tarmaqtarymen, 218-babynyń 1-bóligimen kináli dep tanylyp, QK-niń 58-babynyń 3-bóligine sáıkes, jazalardy ishinara qosý arqyly túpkilikti 12 jyl merzimge bas bostandyǵynan aıyrý jazasy taǵaıyndaldy.
Al, B. QK-niń 262-babynyń 2-bóligimen, 28-babynyń 5-bóligimen, 190-babynyń 4-bóliginiń 1,2) tarmaqtarymen kináli dep tanylyp, QK-niń 58-babynyń 3-bóligine sáıkes, jazalardy ishinara qosý arqyly túpkilikti 10 jyl merzimge bas bostandyǵynan aıryldy.
Sondaı-aq, A.-nyń qylmystyq jolmen tabylǵan qarajatqa satyp alynǵan múlikteri jábirlenýshilerge zalaldy óteý esebinde óndiriletin boldy.
Aıta keteıik, Mańǵystaý oblysynyń eki turǵyny alaıaqtyq jáne uıymdasqan qylmystyq top qurǵany úshin biri 9 jyl 8 aı, ekinshisi 6 jyl 8 aı merzimge sottalǵan bolatyn. Olar 294 adamdy aldap, jalpy somasy 2,8 mıllıard teńge materıaldyq zalal keltirgen. Bul týraly jazǵan bolatynbyz.
