28 mln. teńge mólsherinde bıýdjet salyǵyn tóleýden jaltarǵan kásipker shartty túrde 2 jylǵa sottaldy

Bul aqparatty QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlady.

Vedomstvonyń atap ótýinshe, Atyraý oblystyq ekonomıkalyq qylmysqa jáne sybaılas jemqorlyqqa qarsy kúres departamenti jeke kásipker M.Erjanovqa qatysty qylmystyq isti tergeýdi aıaqtady. Ol 2008 jyldyń 18 tamyzy men 2009 jyldyń 31 mamyr aılary aralyǵynda kásipkerlik qyzmetti, ıaǵnı qurylys-montaj jumystaryn arnaýly ruqsatsyz (lıtsenzııasyz) júzege asyryp, 92 mln. teńgeden astam asa iri kólemde tabys tapqan. Sonymen qatar, deklaratsııaǵa kirister men shyǵystar týraly kórineý burmalanǵan málimetterdi engizip, memleketke 28 mln.teńgeden astam zalal keltirgen .

Atyraý qalalyq №2 sotynyń úkimimen M.Erjanov QR QK 190-baby 2-bóliginiń «b» tarmaǵy (zańsyz kásipkerlik), 221-babynyń 1-bóligi (azamattyń salyq tóleýden jaltarýy) boıynsha kináli dep tanylyp, shartty túrde 2 jylǵa bas bostandyǵynan aıyrýǵa sottaldy.