28 maýsymda parlamenttik sessııa jumysynyń qorytyndysy jasalady – Erlan Qoshanov
ASTANA. KAZINFORM – Májilis 100 zań qabyldady, sonyń ishinde ár úshinshi zańǵa depýtattar bastamashylyq etti. Bul týraly palata tóraǵasy Erlan Qoshanov aıtty.
«Búgin biz Májilistiń ekinshi sessııadaǵy jumysyn aıaqtaǵaly otyrmyz. Jalpy, parlamenttik sessııa jumysyn juma kúni Parlament Palatalarynyń birlesken otyrysynda qorytyndylaımyz. Qazir endi Májilis jumysynyń keıbir nátıjelerine qysqasha toqtalyp óteıin. Ótken sessııa mazmundy ári nátıjeli boldy. Prezıdenttiń aýqymdy reformalar baǵytyn zańnamalyq turǵydan qamtamasyz etý boıynsha baıypty da qajyrly is atqaryldy. Osy sessııada biz 39 jalpy otyrys ótkizip, 302 máseleni qaradyq. Májilis 100 zań qabyldady, sonyń ishinde ár úshinshi zańǵa depýtattar bastamashylyq etti. Biz Prezıdenttiń saıası reformalaryn ilgeriletýge baǵyttalǵan zańdar toptamasyn qabyldadyq. Olardyń ishinde – sot júıesi týraly konstıtýtsııalyq zań, adam saýdasyna qarsy is-qımyl týraly, mass-medıa týraly zańdar bar», - E. Qoshanov Májilistiń jalpy otyrysynda.
Onyń aıtýynsha, qoǵamdy uzaq ýaqyt boıy alańdatyp kelgen ótkir máseleler – halyqtyń shamadan tys kredıt alýy, áıelder men balalar qaýipsizdigi, sondaı-aq lýdomanııa máseleleri zańnamalyq turǵydan retteldi. Asa mańyzdy zańdar ishinen «Ulttyq qor – balalarǵa» jáne jer qoınaýyn paıdalaný máseleleri týraly qujattar bar. Bul zańdar – áleýmettik ádilettilik qaǵıdattary is júzine asyp jatqanynyń aıshyqty aıǵaǵy.
«Ondaǵan jyldar boıy shahterlerdiń, kenshilerdiń, metallýrgterdiń zeınetke shyǵý jasyn tómendetý máselesi sheshilmeı kelgen edi. Osy oraıda Zııandy eńbek jaǵdaılarynda jumys isteıtin adamdardy áleýmettik turǵydan qorǵaý týraly zań qabyldadyq. Sol arqyly biz 400 myńnan astam óndiris eńbekkerleriniń talap-tilegin oryndadyq. Buǵan qosa, el Prezıdentiniń jańa ekonomıkalyq saıasatyn iske asyrý úshin memlekettik satypalym, bıznes júrgizý, jylý energetıkasy, jer qoınaýyn paıdalaný týraly zańdar qabyldandy. Depýtattar Memleket basshysynyń úshinshi Ulttyq quryltaıda aıtylǵan zańnamalyq bastamalaryn da iske asyrdy. Atap aıtqanda, veıp taratýǵa qarsy, biregeı tarıhı obektilerdi qorǵaýǵa arnalǵan zańnamalyq sharalar qabyldandy. Vandalızm úshin jaýapkershilik kúsheıtildi. Depýtattar óz qyzmeti aıasynda parlamenttik baqylaý áleýetin tolyq kólemde paıdalandy. Májilismender memlekettik organdardyń laýazymdy adamdary atyna 527 depýtattyq saýal joldady. Depýtattyq saýaldarǵa azamattardyń talap-tilekteri men muń-muqtajy arqaý boldy», - dedi Májilis tóraǵasy.
