Doktorantýra men magıstratýraǵa ótinish berý 28 qazanda bastalady
ASTANA. KAZINFORM — 28 qazanda magıstratýraǵa túsý úshin keshendi testileýge ótinishterdi qabyldaý jáne doktorantýraǵa túsý emtıhanyna qujattardy qabyldaý bastalady. Bul týraly Ǵylym jáne joǵary bilim mınıstrligi málim etti.
Ótinish berý QR ǴJBM Ulttyq testileý ortalyǵynyń app.testcenter.kz saıty arqyly ótedi.
KT-ǵa ótinish berý 2025 jylǵy 10 qarashaǵa deıin jalǵasady.
Vedomstvonyń dereginshe, shyǵarmashylyq daıyndyqty talap etetin bilim berý baǵdarlamalarynyń toptary boıynsha beıindi magıstratýraǵa túsýshilerden qujattardy qabyldaý aǵymdaǵy jylǵy 28 qazan men 10 qarasha aralyǵynda joǵary jáne (nemese) joǵary oqý ornynan keıingi bilim berý uıymdarymen júzege asyrylady.
— Testileýdiń ózi qarasha-jeltoqsan aılarynda ótedi. Ótinish berý kezinde túsýshi testileýdi tapsyrý qalasyn óz erkimen tańdaıdy. Túsýshiler ótinishterdi qabyldaý merzimi aıaqtalǵanǵa deıin (10 qarashaǵa deıin) bilim berý baǵdarlamalarynyń toby, tili jáne testileýdi tapsyrý qalasyn ózgertý boıynsha ótinishke ózgerister engize alady. Ótinishterdi qabyldaý bazasy jabylǵannan keıin tańdalǵan bilim berý baǵdarlamalarynyń toby men testileý tapsyrý qalasy ózgertilmeıdi. Testileýdi ótkizý kúni týraly aqparat túsýshiniń jeke kabınetinde aǵymdaǵy jylǵy 14 qarashada qoljetimdi bolady, — delingen habarlamada.
Mınıstrliktiń málimetinshe, ǵylymı-pedagogıkalyq magıstratýraǵa túsý úshin keshendi testileý elektrondyq formatta ótkiziledi jáne úsh bólimnen turady:
- shet tili boıynsha test
- oqýǵa daıyndyǵyn anyqtaýǵa arnalǵan test
- bilim berý baǵdarlamalary tobynyń beıini boıynsha test.
Testileýge 3 saǵat 55 mınýt beriledi. Shekti ball — 75 ball, onyń ishinde shet tili boıynsha keminde 25 ball, oqýǵa daıyndyǵyn anyqtaýǵa arnalǵan test boıynsha keminde 7 ball, bilim berý baǵdarlamalary tobynyń beıini boıynsha: birinshi beıindi pán boıynsha keminde 7 ball, ekinshi beıindi pán boıynsha keminde 7 ball.
Beıindi magıstratýraǵa túsýshiler tek bilim berý baǵdarlamalary tobynyń beıini boıynsha test tapsyrady. Shekti ball keminde 30 ball, onyń ishinde birinshi beıindi pán boıynsha keminde 7 ball, ekinshi beıindi pán boıynsha keminde 7 ball.
— Doktorantýraǵa túsý emtıhanyn tapsyrýǵa ótinish berý 2025 jylǵy 10 qarashaǵa deıin jalǵasady. Doktorantýraǵa túsýshiler DTE-ge qatysý úshin ótinish bergenge deıin joǵary jáne (nemese) joǵary oqý ornynan keıingi bilim berý uıymdarynyń qabyldaý komıssııasyna qujattardy tapsyrýy qajet. Doktorantýraǵa túsý úshin QAZTEST júıesi boıynsha memlekettik tildi meńgergenin rastaıtyn sertıfıkat jáne shet tilin meńgergenin rastaıtyn sertıfıkat usyný qajet. TOEFL ITP sertıfıkaty bar tulǵalar DTE bastalǵanǵa deıin aǵylshyn tilin bilýge arnalǵan qosymsha testileýdi tapsyrady, — dep jazdy mınıstrliktiń baspasóz qyzmeti.
Túsý emtıhany jeltoqsan aıynda ótedi. Eger túsýshige berilgen ótinishke (testileýdi tapsyrý qalasy, bilim berý baǵdarlamalarynyń toby) ózgerister engizý qajet bolǵan jaǵdaıda, oǵan ótinishterdi qabyldaý bazasy jabylǵanǵa deıin (10 qarashaǵa deıin) ótinishti óńdeýge nemese óshirýge múmkindik beriledi. Qosymsha testileýdi ótkizý orny, kúni men ýaqyty týraly aqparat túsýshiniń jeke kabınetinde aǵymdaǵy jylǵy 14 qarashada, túsý emtıhany boıynsha aqparat 27 qarashada qoljetimdi bolady.
Fılosofııa doktorlary (RhD) baǵdarlamasy boıynsha doktorantýraǵa túsý emtıhanyna áńgimelesý, esse jazý jáne bilim berý baǵdarlamasy tobynyń beıini boıynsha emtıhan kiredi. Beıini boıynsha doktorlar baǵdarlamasy boıynsha, onyń ishinde ındýstrııalyq PhD baǵdarlamalary boıynsha doktorantýraǵa túsý emtıhany áńgimelesý jáne bilim berý baǵdarlamalary tobynyń beıini boıynsha emtıhan suraqtary bólimderinen turady. Memlekettik bilim berý tapsyrysy boıynsha fılosofııa doktorlary (RhD) baǵdarlamasy boıynsha doktorantýraǵa bilim alý úshin túsý emtıhanynan keminde 75 ball, beıini boıynsha doktorlar baǵdarlamasy boıynsha, onyń ishinde ındýstrııalyq PhD baǵdarlamalary boıynsha doktorantýraǵa — keminde 50 ball jınaǵan tulǵalar konkýrstyq negizde qabyldanady.
Al osy jyly magıstratýraǵa 23 065 talapker túskenin jazǵan bolatynbyz.