28 qarashada qaı joldarda qozǵalys tártibi ózgerdi

 ALMATY. KAZINFORM – «QazAvtoJol» birqatar baǵyt boıynsha qozǵalys rejımi jańartylǵanyn habarlady. Keı óńirdegi jol ýchaskesinde shekteýler jeńildetilse, keıbir joldarda qozǵalysqa áli de tyıym salynyp otyr.

Ulttyq kompanııanyń málimetinshe, «Tımırıazevo – Sarykól – oblys shekarasy» avtojolynyń 0-30-shaqyrym ýchaskesinde (Qostanaı oblysynyń shekarasy – Tımırıazevo aýyly aralyǵy) buryn engizilgen barlyq kólik túrine qozǵalys shekteýi alyndy. Qazirgi ýaqytta shekteý tek júk kólikteri men qoǵamdyq kólik quraldaryna ǵana engizilgen.

Al «Astana – Shiderti – Pavlodar – Ýspenka – RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalysqa ýaqytsha shekteý engizildi.

Qalqaman eldi mekeninen Astanaǵa qozǵalys Bereke «Qalqaman – Aqsý» kólik aıryǵy arqyly (uzaqtyǵy 6 shaqyrym) jáne Pavlodar qalasynan Qalqaman eldi mekenine qozǵalys «Baıanaýyl» kólik aıryǵy arqyly júzege asyrylady.

Sondaı-aq trkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde saqtalady.

Aýa raıy

2025 jylǵy 28 qarashada Aqmola, SQO, ShQO, Abaı jáne Pavlodar oblystarynyń keı jerinde qar aralas jańbyr men qar jaýady.

– Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, - delingen habarlamada.

Eske salaıyq, buǵan deıin «Qazgıdromet» RMK eldiń 13 oblysynda aýa raıyna baılanysty eskertý jarııalady.