28 qańtar. QazAqparat kúntizbesi

28 qańtar. DÚISENBІ

Málimetterdi qorǵaý kúni

Jeke málimetterdi qorǵaý týraly konventsııaǵa sáıkes 28 qańtar Málimetterdi qorǵaý kúni bolyp belgilendi. Bul kúndi ótkizý maqsaty azamattardyń ózderi týraly qandaı málimetter ne úshin jınalyp jatqanynan habardar etý boldy. Bul kún 2007 jyly belgilendi jáne alǵash ret atalyp ótti.

Komıýnıtı-menedjerler kúni

Jyl saıyn álemniń túrli elderinde qańtardyń tórtinshi dúısenbisinde toılanatyn kásibı mereke. Komıýnıtı-menedjerler - jasampazdyq, damý, basqarý jáne qoǵamdastyq ókilderimen qarym-qatynas jasaýǵa jaýapty qyzmetkerler. Olar, sondaı-aq UGC-júıelerdi jasap, olardy qoldaýmen aınalysady. Komıýnıtı-menedjerdiń jumysy PR, HR, áleýmettik psıhologııa jáne basqa da gýmanıtarlyq salalardyń toǵysynda jatyr.

ESTE QALAR OQIǴALAR

1955 jyly Qazaq KSR halyq ártisi Asqar Toqpanov Qurmanǵazy atyndaǵy Almaty memlekettik konservatorııasy janynan teatr fakýltetin ashty, 1977 jyly onyń bazasynda Almaty teatr-kórkemsýret ınstıtýty ashyldy.

1989 jyly Almaty memlekettik teatr-kórkemóner ınstıtýtyna Qazaqstannyń tuńǵysh halyq aǵartý komıssary, mádenıet pen ónerdi damytýǵa súbeli úles qosqan Temirbek Qarauly Júrgenovtiń esimi berildi. 1993 jyly T. Júrgenov atyndaǵy Almaty memlekettik teatr-kórkemóner ınstıtýty T. Júrgenov atyndaǵy Qazaq memlekettik teatr jáne kıno ınstıtýty bolyp ózgertildi. Qazaqstan Respýblıkasy Úkimetiniń 2000 jylǵy 14 aqpandaǵy №236 qaýlysyna sáıkes, burynǵy Qazaq memlekettik teatr jáne kıno ınstıtýty men Qazaq memlekettik kórkemóner akademııasy negizinde T.Q. Júrgenov atyndaǵy Qazaq memlekettik óner akademııasy quryldy.

1992 jyly Qazaqstan Respýblıkasy men Koreıa Respýblıkasy arasynda dıplomatııalyq qarym-qatynas ornatý týraly hattamaǵa qol qoıyldy.

1993 jyly QR Joǵarǵy Keńesi táýelsiz Qazaqstan Respýblıkasynyń tuńǵysh Konstıtýtsııasyn qabyldady.

1994 jyly Shyǵys Qazaqstan oblysynyń Abaı aýdanynda uly Abaıdyń shákirti, aqyn Kókbaı Janataıuly atyndaǵy qor ashyldy.

1994 jyly «Qazaqstan-Zaman» birlesken qazaq-túrik gazetiniń bazasynda qazaq tilindegi halyqaralyq táýelsiz aptalyq - «Túrkistan» gazetiniń birinshi nómiri jaryq kórdi. Birinshi bas redaktory - Qazaqstannyń halyq jazýshysy Qaltaı Muhamedjanov.

2011 jyly Qazaqstan Prezıdenti Nursultan Nazarbaev QR Parlamenti palatalarynyń birlesken otyrysynda «Bolashaqty birge jasaıyq!» Joldaýyn tanystyrdy.

2013 jyly Qazaqstan Respýblıkasy Prezıdentiniń janyndaǵy Ortalyq kommýnıkatsııalar qyzmeti (OKQ) óziniń resmı saıtyn, qazaq, orys jáne aǵylshyn tilderindegi veb-resýrsy - ortcom.kz tanystyrdy.

2013 jyly Qazaqstan Respýblıkasynyń Ázerbaıjan Respýblıkasyndaǵy elshiliginiń «Caspian Service» JShQ oryndaǵan jobasy atalmysh eldiń ekonomıka salasyndaǵy bedeldi syılyqtarynyń biri - Azeri Business Award-2012 ulttyq syılyǵynyń «Halyqaralyq jobalar aıasyndaǵy ınnovatsııalyq sáýletkerlik sheshimder» atalymyn jeńip aldy.

2015 jyly Qazaqstan Respýblıkasynyń Ulttyq banki «Taıqazan», «Amir Timur», «Boran», «Sháken Aımanov», «8 naýryz» jáne «Basketbol. Olımpıada oıyndary-2016» estelik monetalaryn shyǵardy. Monetalar 925-shi synamaly kúmisten shyǵarylǵan. Maksımaldyq tırajy - 3 myńnan 13 myń danaǵa deıin.

2015 jyly Qazaqstandyq «Ǵarysh baılanysynyń respýblıkalyq ortalyǵy» (ǴBRO) AQ jáne reseılik «Akademık M.F.Reshetnev atyndaǵy «Aqparattyq spýtnıktik júıeler» AAQ qazaqstandyq «KazSat-3» jerserigine tapsyrys berýshi jáne ony daıyndaýshy retinde «KazSat-3» ǵaryshtyq baılanys júıesin qurý týraly jarııalady. Qazaqstanda «KazSat-2» jáne «KazSat-3» ǵarysh apparattarynyń toptamasy qurylyp, elimiz «KazSat» spýtnıktik baılanys pen habar taratýdyń ǵaryshtyq júıesiniń tolyqqandy ıesi atandy.

2017 jyly Almatyda Búkilálemdik XXVIII Ýnıversıada bastaldy. Ony hokkeıshiler bastap berdi. Sporttyń osy túrinen Ýnıversıada medaldaryn Ulybrıtanııa, Qazaqstan, Kanada, Qytaı, Slovakııa, Latvııa jáne Japonııa quramalary sarapqa saldy.

2018 jyly Qytaıda ótken Global golden chart awards saltanatynda qazaqstandyq ánshi Dımash Qudaıbergen «Úzdik ártis» atalymy boıynsha jeńimpaz atandy. Saltanatty shara Beıjińdegi «Jumysshylar» stadıonynda ótti. Dımash qytaı tilinde án aıtty.

2018 jyly Qazaqstanda jáne Reseıde tanymal akter, prodıýser ári rejıser Sanjar Mádı AQSh-ta «Sport oskary» syılyǵynyń ıegeri boldy. «Sporttyq Oskar» syılyǵyn tabystaý rásimi jyl saıyn Nıý-Djersı shtatyndaǵy Atlantık-Sıtı qalasynda ótkiziledi. Aktsııaǵa búkil álemniń belgili saıasatkerleri men bıznesmenderi, sportshylary qatysady. «Sporttyq Oskar» - aıqas óneri men jekpe-jek salasynda ótkiziletin halyqaralyq aıtýly oqıǵalardyń qataryna jatady.