28 aqpanǵa qaraǵan túni Baıqońyrdan ǵaryshtyq júk kemesi ushyrylady
ASTANA. KAZINFORM – «Baıqońyr» ǵarysh aılaǵynan bıylǵy alǵashqy ushyrylym qystyń sońǵy kúni, 2025 jyldyń 28 aqpanyna josparlanǵan. «Progress MS-30» júk tasymaldaý kemesi Halyqaralyq ǵarysh stansasyna (HǴS) jiberiledi.
Ushý aldyndaǵy daıyndyq josparǵa sáıkes júrip jatyr. Mamandar ǵarysh kemesine janarmaı quıyp, ony «Baıqońyr» ǵarysh aılaǵynyń 254-shi ýchaskesiniń qurastyrý-synaý korpýsyna jóneltti. Onda keme ushyrylym aldyndaǵy dınamıkalyq stendke ornalastyryldy, dep habarlady Roskosmostyń baspasóz qyzmeti.
«Progress MS-30» kóliktik júk kemesi bar «Soıýz-2.1a» zymyran tasymaldaǵyshyn «Baıqońyr» ǵarysh aılaǵynyń 31-platformasynan ushyrý 28 aqpanǵa, Astana ýaqytymen saǵat 02:24-ke josparlanǵan.
Jyldyń alǵashqy ushyrylymyn Qazaqstan men Reseı ǵarysh agenttikteriniń basshylary baqylaıdy.
Derekkózdiń habarlaýynsha, ǵarysh aılaǵynda Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev pen Roskosmostyń jańa basshysy Dmıtrıı Bakanovtyń jumys kezdesýi josparlanǵan.
Sondaı-aq Baıqońyrda HǴS baǵdarlamasy boıynsha kezekti ushyrýǵa daıyndyq júrip jatyr. Baıqońyr ǵarysh aılaǵynan «Soıýz MS-27» basqarylatyn ǵarysh kemesi bar «Soıýz-2.1a» zymyran tasymaldaǵyshyn ushyrý 2025 jyldyń sáýir aıyna josparlanǵan. Quramynda Roskosmos ǵaryshkerleri Sergeı Ryjıkov pen Alekseı Zýbrıtskıı jáne NASA astronavty Djonatan Kım bar 73-shi uzaq merzimdi ekspedıtsııa ekıpajy ushyrýǵa daıyndalyp jatyr.
Buǵan deıin «Baıqońyr» ǵarysh aılaǵynda «Báıterek» ǵaryshtyq zymyran keshenin qurý týraly zań jobasy Májiliske engizilgeni týraly habarlanǵan bolatyn.
Aıta keteıik, 2025 jyldyń 2 maýsymynda Baıqońyr ǵarysh aılaǵy men attas qalanyń qurylǵanyna 70 jyl tolady.
Úkimet Baıqońyr túbindegi aerodromdy Qazaqstan menshigine alýdan bas tartty.