28 aqpanda Astana ákiminiń halyq aldyndaǵy eseptik kezdesýi ótedi
ASTANA. QazAqparat - 2018 jyldyń 28 aqpanynda saǵat 10:00-de «Astana» kontsert zalynda (burynǵy Kongress-holl) qala ákimi Áset Isekeshevtiń elorda halqy aldyndaǵy dástúrli eseptik kezdesýi ótedi, dep habarlaıdy «QazAqparat» HAA ákimdiktiń resmı saıtyna silteme jasap.
Shara Astana qalasy ákimdiginiń Facebook áleýmettik jelisindegi resmı akkaýntynda onlaın-rejimde kórsetiletin bolady. Eseptik kezdesý barysynda áleýmettik jeliniń paıdalanýshylary da ákimge óz suraqtaryn qoıa alady.
Qala turǵyndaryna yńǵaıly bolý úshin L. N. Gýmılev atyndaǵy Eýrazııa ulttyq ýnıversıteti (Q. Muńaıtpasov k-si, 5) men S.Seıfýllın atyndaǵy Qazaq agrotehnıkalyq ýnıversıtetiniń (Jeńis d-ly, 62) ǵımarattarynda eseptik kezdesýden tikeleı translıatsııa uıymdastyrylatyn bolady. Mundaǵy azamattar tikeleı qosylý arqyly ákimge óz suraqtaryn qoıa alady.
Budan bólek, «Astana» kontsert zalynyń foıesinde qala ákiminiń orynbasarlary, basqarma jáne elorda qyzmetteriniń basshylary saǵat 8:30-dan 17:00-ge deıin azamattardy qabyldap, olarǵa qajetti keńes beretin bolady.
