28 aqpan. Týǵan kún ıeleri
ESІMDER
173 jyl buryn (1846-1945) uly aqyn, jyraý, jyrshy, KSRO memlekettik syılyǵynyń laýreaty Jambyl JABAEV dúnıege keldi.
Jambyl oblysy Jambyl taýynyń eteginde týǵan. Jasynan óleń-jyrǵa qanyp ósken, óz anasy Uldannyń aqyndyq talantyn boıyna sińirgen, «Meniń pirim - Súıinbaı...» dep Jambyldyń ózi jyrǵa qosqandaı, Súıinbaı Aronuly sııaqty jyr dańǵylynan tálim-tárbıe alǵan. Jambyl 1919 jyly Jetisý halyq aqyndary bas qosqan sletke qatysty. 1934 jyly respýblıkalyq óner sheberleriniń tuńǵysh sletinde jyr tolǵap, taǵy bir kózge tústi. «Zamana aǵymy», «Belsendilerge», «Qazaqstan toıyna», «Jastar aldyndaǵy sóz» sııaqty arnaý, tolǵaýlary osy tusta jyrlandy. Onyń úzdik shyǵarmalary 40-tan astam shet elder tilderine aýdaryldy. Uly jyraý qazaq halqyn, onyń poezııasyn búkil álemge jarııa etti. 1938 jyly Jambyldyń shyǵarmashylyq óneriniń 75 jyldyǵyn toılaǵanda, oǵan álemniń ár túkpirinen quttyqtaýlar keldi. Romen Rollan, Martın Andersen, Nekse, Katarına Sýsanna Prıchard sııaqty ataqty sýretkerler Jambyl poezııasyna óte joǵary baǵa berdi. Jambyl týraly júzdegen óleń-jyrlar jazyldy. HH ǵasyrdaǵy halyq aqyndaryna Jambyldyń áseri óte zor boldy. Bul qatarda Kenen Ázirbaev, Úmbetáli Káribaev, Ábdiǵalı Sarıev, Nartaı Bekejanov, Doskeı Álimbaev, Saıadil Kerimbekov, Orynbaı Taımanov sııaqty belgili ımprovızatorlar bar. 1941 jyly Stalındik (keıin KSRO Memlekettik) syılyǵynyń laýreaty atanǵan. І saılanǵan Qazaq KSR Joǵarǵy Keńesiniń depýtaty, KSRO jáne Qazaqstan Jazýshylar odaǵynyń múshesi boldy. Jambyldyń esimi Qazaqstannyń bir oblysyna, birneshe aýdandarǵa, birqatar eldi mekenderge, mekemeler men oqý oryndaryna, óner ordalaryna, mektepterge, kóshelerge berilgen. Qazaq halqy Jambyldyń 100 jyldyq, 125 jyldyq, 150 jyldyq, 160 jyldyq toılaryn halyqaralyq deńgeıde saltanatty túrde atap ótti.
62 jyl buryn (1957) QR Parlament Májilisi VI shaqyrylymynyń depýtaty Áleýmettik-mádenı damý komıtetiniń múshesiKáribaı Imanjanuly MUSYRMAN dúnıege keldi.
Soltústik Qazaqstan oblysy Aıyrtaý aýdany Dáýqara aýylynda týǵan. S. Kırov atyndaǵy Qazaq memlekettik ýnıversıtetiniń jýrnalıstıka fakýltetin bitirgen (1981), jýrnalıst. Qazaqstannyń merzimdi baspasózinde jarııalanǵan kóptegen maqalalardyń, ocherkterdiń avtory. «Nur Otan» partııasy SQOF saıası keńesiniń múshesi.
1981 jyldan - Soltústik Qazaqstan oblystyq «Lenın týy» gazetiniń tilshisi, menshikti tilshisi. 1985 jyldan - Kókshetaý oblystyq «Kókshetaý» gazetiniń menshikti tilshisi, bólim meńgerýshisi, redaktor orynbasarynyń m.a. 1990 jyldan - respýblıkalyq «Egemen Qazaqstan» gazetiniń menshikti tilshisi. 1992 jyldan - Kókshetaý oblystyq teleradıokompanııasynyń tóraǵasy. 1997 jyldan - «Respýblıkalyq «Qazaqstan» teleradıokorporatsııasy» AQ Soltústik Qazaqstan oblystyq fılıalynyń dırektory. 2007 jyldan - «Soltústik Qazaqstan» Soltústik Qazaqstan oblystyq gazetiniń redaktsııasy» QMK dırektory - bas redaktory. 2008 jyldyń jeltoqsan aıynan - «Qyzyljar Aqparat» medıaholdıngi» QMK dırektorynyń - bas redaktory. 2012 jyldan - «Qyzyljar - Aqparat» JShS dırektory.
Qazirgi qyzmetinde 2016 jyldyń naýryz aıynan beri.
«Qazaqstan Respýblıkasynyń táýelsizdigine 10 jyl (2001), «Qazaqstan Konstıtýtsııasyna 10 jyl» (2005), «Qazaqstan Respýblıkasynyń táýelsizdigine 20 jyl» (2011) medaldarymen marapattalǵan.
55 jyl buryn (1964 ) Soltústik Qazaqstan oblysynyń prokýrory Berik Noǵaıuly ASYLOV dúnıege keldi.
Jambyl oblysy Moıynqum aýdany Birlik aýylynda týǵan. 1991-1992 jyldary Almaty qalasy Alataý aýdany prokýratýrasynyń taǵylymdamashysy, 1992 jyldyń 17 naýryzynda Alataý aýdan prokýrasynyń aǵa tergeýshisi qyzmetin atqarǵan.
1993 jyly Bas prokýratýra tergeýshisi, aǵa tergeýshisi, 1995-1996 jyldar aralyǵynda Almaty áýe kólik prokýrorynyń orynbasary boldy.
1996 jyldyń sáýiri men jeltoqsany aralyǵynda Memlekettik tergeý komıteti, Ulttyq qaýipsizdik komıteti, Qorǵanys mınıstrliginiń áskerı barlaý qyzmetinde, Prezıdent kúzeti qyzmet organdarynda jedel-izdestirý qyzmetiniń zańdylyǵyn qadaǵalaý boıynsha bólim bastyǵy laýazymynda qyzmet atqardy.
1996 jyldyń jeltoqsan aıynda QR Bas prokýratýrasynyń jedel- izdestirý qyzmetiniń zańdylyǵyn qadaǵalaý boıynsha bóliminiń aǵa prokýrory bolyp taǵaıyndaldy. Sol jyly atalǵan bólimniń bastyǵy laýazymyna usynylyp, onda 2001 jylǵa deıin qyzmet etti. 2001 jyldyń qańtarynan 2003 jyldyń sáýirine deıin Shymkent qalasynyń prokýrory, 2003-2005 jyldary Ońtústik Qazaqstan oblysy prokýrorynyń orynbasary, 2005-2006 jyldary oblys prokýrorynyń birinshi orynbasary qyzmetterin atqardy.
2006-2008 jyldary Batys aımaqtyq kólik prokýrory, 2008 jyldyń naýryzynan 2010 jyldyń maýsymyna deıin Aqtóbe oblysynyń prokýrory boldy. 2010 jyldyń maýsym aıynan 2011 jylǵa deıin - Qazaqstan Respýblıkasy Bas prokýrorynyń orynbasary.
2011-2017 jyldary - Almaty qalasynyń Bas prokýrory.
«Eren eńbegi úshin» medalimen, «Astananyń 10 jyldyǵy» mereıtoılyq medalimen jáne «Ulttyq qaýipsizdikti qamtamasyz etýdegi úlesi úshin» medalimen marapattalǵan.
2011 jyldyń mamyr aıynda Qazaqstan Respýblıkasy Prezıdentiniń Jarlyǵymen 3 dárejeli «Memlekettik ádilet keńesshisi» shenine ıe boldy.
Qazirgi qyzmetinde 2017 jyldyń aqpan aıynan bastap.
44 jyl buryn (1975) Qostanaı oblysynyń prokýrory Tımýr Qaıyrbekuly SÚLEIMENOV dúnıege keldi.
Reseı Federatsııasynyń Novosibir oblysynda Kýıbyshev qalasynda týǵan. Ál-Farabı atyndaǵy Qazaq ulttyq ýnıversıtetin «halyqaralyq quqyq» mamandyǵy boıynsha bitirgen.
Eńbek jolyn 1997 jyly Almaty qalasy Almaly aýdandyq prokýratýrasynda Quqyqtyq statıstıka jáne aqparat ortalyǵynda prokýror kómekshisi bolyp bastaǵan. 2008-2013 jyldary Almaly aýdany prokýrorynyń aǵa kómekshisi, Almaty qalalyq prokýratýrasynda Jedel-izdestirý, tergeý jáne anyqtaý zańdylyǵyn qadaǵalaý jónindegi basqarmasynyń prokýrory, Almaty qalasy prokýrorynyń birinshi orynbasary qyzmetterin atqardy. 2013 jyldyń qazan aıynan 2017 jyldyń tamyzyna sheıin Astana qalasy prokýrorynyń birinshi orynbasary boldy.
Qazirgi qyzmetine 2017 jyldyń tamyz aıynda taǵaıyndaldy. «Eren eńbegi úshin» medalimen marapattalǵan.