28 100 AQSh dollaryn alyp ótpek bolǵan aqtaýlyq 18 myń dollarynan aıyrylyp qaldy

AQTAÝ. KAZINFORM — Mańǵystaý oblysy boıynsha Memlekettik kirister departamentiniń «Aýejaı-Aqtaý» keden beketiniń qyzmetkerleri UQK Shekara qyzmetimen birlesip, «Aqtaý — Tbılısı» halyqaralyq áýe reısi boıynsha kedendik baqylaý júrgizý barysynda, bir jolaýshydan 28 100 AQSh dollary kóleminde qolma-qol shetel valıýtasy anyqtaldy. 

Atalǵan jolaýshy qolma-qol shetel valıýtasyn deklaratsııalaýdyń qajeti joq dep aýyzsha málimdegen.

— Osy derek boıynsha Aqtaý qalalyq ákimshilik quqyq buzý jónindegi mamandandyrylǵan sotynyń qaýlysymen azamat Ákimshilik quqyq buzýshylyq týraly kodeksiniń 551-babynyń 3-bóligine sáıkes ákimshilik quqyq buzǵany úshin kináli dep tanylyp, oǵan 2 276 753,75 teńge kóleminde ákimshilik aıyppul salyndy. Sonymen qatar, 18 100 AQSh dollary memleket kirisine tárkilenip, 10 000 AQSh dollary sot qaýlysy zańdy kúshine engennen keıin ıesine qaıtarylatyn boldy, — delingen habarlamada.

Budan bólek, Aqtaý halyqaralyq áýejaıynda «Aqtaý — Kýtaısı» reısimen ushýǵa nıettengen 1991 jyly týǵan Qazaqstan Respýblıkasynyń azamatynan 12 500 AQSh dollary kóleminde jasyryn qolma-qol aqsha anyqtaldy. Atalǵan derek boıynsha ákimshilik materıal sotqa joldanǵan.

Osy oqıǵalardan keıin Mańǵystaý oblysy boıynsha Memlekettik kirister departamenti elden shetel valıýtasyn áketý kezinde saqtalýy tıis zańdy talaptardy taǵy da eske saldy.

«Qazaqstan Respýblıkasyndaǵy kedendik retteý týraly» Kodekstiń 343-baby 1-tarmaǵynyń 7) tarmaqshasyna sáıkes, EAEO kedendik aýmaǵyna birjolǵy ákelý nemese EAEO kedendik aýmaǵynan birjolǵy áketý kezinde qolma-qol aqsha men jol chekteriniń jalpy somasy 10 000 (on myń) AQSh dollarynan asatyn jaǵdaıda olardy kedendik deklaratsııalaý talap etiledi (deklaratsııa tapsyrý kúnine qoldanylatyn valıýta baǵamy boıynsha esepteledi).

Alaıda, eldiń ulttyq múddelerin qorǵaý jáne qarjylyq turaqtylyqty qamtamasyz etý maqsatynda, 2022 jylǵy 14 naýryzdaǵy QR Prezıdentiniń № 830 Jarlyǵyna sáıkes, qolma-qol shetel valıýtasyn jáne (nemese) shetel valıýtasyndaǵy aqsha quraldaryn Qazaqstan Respýblıkasynan 10 000 (on myń) AQSh dollarynan asatyn somada (Ulttyq banktiń valıýtalyq baǵamy boıynsha) áketýge tyıym salynǵan.

Sonymen qatar, Eýrazııalyq ekonomıkalyq komıssııa Alqasynyń 2019 jylǵy 23 shildedegi № 124 «Jeke paıdalaný úshin arnalǵan taýarlardy kedendik deklaratsııalaý týraly» sheshimine sáıkes, 16 jasqa tolmaǵan adamdardyń jeke paıdalanýǵa arnalǵan taýarlary týraly málimetter olardy alyp júretin adamnyń taýarlarymen birge bir jolaýshylar kedendik deklaratsııasynda kórsetiledi. Osylaısha, árbir otbasy múshesine 10 000 (on myń) AQSh dollarynan aspaıtyn kólemde shetel valıýtasyn alyp ótýge ruqsat etiledi.

Buǵan deıin, Mańǵystaý oblysynda ınvestıtsııalyq jobalarǵa baqylaý kúsheıtiletinin jazǵan bolatynbyz.