276 jaǵdaı: Almatyda týberkýlez syrqatynyń sany 20 paıyzǵa azaıǵan

ALMATY. KAZINFORM — Almaty sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova qalada týberkýlez boıynsha epıdemıologııalyq jaǵdaı turaqty ekenin aıtty.

Onyń sózinshe, 2025 jyldyń 8 aıynda týberkýlezben syrqattanýdyń derekteri 23,02%-ǵa tómendegen. Bıyl týberkýlez alǵash anyqtalǵan 276 naýqas tirkeldi, 2024 jyldyń uqsas kezeńinde — 350 jaǵdaı boldy.

— Syrqat juqtyrǵandar arasynda tynys alý organdarynyń týberkýlezi basym bolyp keledi — 86,23% (238 jaǵdaı). Sonymen qatar jasóspirimder arasynda týberkýlez juqtyrýdyń 3,2 ese ósýi baıqaldy. Infektsııanyń negizgi juǵý joly — aýa arqyly. Naýqas adam jótelgen kezinde kózge kórinbeıtin, 2 metrge deıingi qashyqtyqqa taralatyn erekshe «aerozolder» paıda bolady. Dıagnostıkalyq turǵydan aýrýdyń asa mańyzdy belgileriniń biri — 3 apta boıy qaıtpaıtyn jótel, qaqyryq tastaý, dene salmaǵyn joǵaltý, — dedi Ásel Qalyqova.

Maman aýrýdyń aldyn alýdyń basty sharttaryn atap ótti:

— ár adamnyń óz densaýlyǵyna nemquraıdy qaramaýy;

— densaýlyǵyna shaǵymdary bolǵan jaǵdaıda der kezinde dárigerge qaralýy;

— jylyna 1 ret flıýorografııalyq tekserýden ótýi;

— tolyqqandy, sapaly tamaqtanýy;

— aýrý adammen qarym-qatynasta bolǵan jaǵdaıda, aldyńǵy flıýorografııalyq tekserýden ótkenine 6 aı nemese odanda kóp ýaqyt ótse, qaıta tekserilýi kerek;

— bólmelerdi jıi jeldetý;

— táýekel tobyndaǵy 14 jasqa deıingi balalarda, sondaı-aq 15-17 jastaǵy jasóspirimder de týberkýlezdi erte anyqtaý úshin mantý synamasymen mindetti tekserý;

— jańa týǵan nárestelerge BTsJ vaktsınatsııasy náresteniń týylǵannan keıingi alǵashqy tórt kún ishinde egý kabınetinde júrgizý.

Eske salaıyq, Qazaqstanda týberkýlezdi emdeý merzimi qysqardy.