272 myń erkek, 11 myń áıel balasyna alıment tóleýden jaltaryp júr
ASTANA. KAZINFORM – Ótken jyly balasyna alıment tólemegeni úshin 4,5 myńnan astam boryshker ákimshilik jaýapkershilikke tartyldy. Bul týraly Ortalyq kommýnıkatsııalar qyzmetindegi brıfıngte Ádilet mınıstrliginiń resmı ókili Talǵat Ýálı aıtty.
- Alıment óndirý boıynsha atqarýshylyq is júrgizý – Ádilet mınıstrligi turaqty baqylaýda ustap otyrǵan áleýmettik mańyzy bar máselelerdiń biri. Qazir óndiriste 283 myń atqarýshylyq is bar. Onyń ishinde boryshker er adamdar sany 272 myń bolsa, áıelder sany 11 myńnan asady. Ondaǵy 16 352 is boıynsha bereshek 16 mlrd teńge, - dedi ol.
Resmı ókildiń aıtýynsha, kóp jaǵdaıda boryshkerlerdiń alımenti aı saıyn jumys berýshilerdiń býhgalterııasy arqyly óndiriledi. Sondyqtan boryshkerlerdi jumysqa ornalastyrý belsendi túrde júrgizilip jatyr.
- 2023 jyly 4 238 adam jumysqa ornalastyrylsa, bul kórsetkish 2024 jyly 6 myńnan astam adam boldy. Óz mindetterin oryndamaǵany úshin boryshkerler ákimshilik jáne qylmystyq jaýapkershilikke tartylady. Máselen, 2024 jyly 4,5 myńnan astam boryshker ákimshilik jaýapkershilikke tartyldy. Al QK 139-baby (alıment tóleý mindetterin oryndamaý) boıynsha 391 adam sottaldy. Sondaı-aq boryshkerlerdiń bank shottaryna tyıym salý jáne ýaqytsha shekteýler sııaqty sharalar qoldanylady, - dedi Talǵat Ýálı.
Osy rette ol bıylǵy iri kólemdegi óndirip alýlar boıynsha birer mysal keltirdi. Máselen, Astanada alıment tólemeı júrgen azamattyń Mercedes-Benz S400 markaly kóligi 23 mln teńgege satyldy. Jambyl oblysynda boryshker qaryzdy óteý úshin 11 mln teńgeden astam turatyn jyljymaıtyn múlkin qaryzyn óteý úshin berdi. Boryshkerge qylmystyq is qozǵaldy. Al Almatyda 9 mln teńgeden astam qaryzdy óteý úshin 2017 jylǵy Hyundai Tucson avtokóligi óndirip alýshyǵa tapsyryldy.
Óskemende 7 balasyna alıment tólemegen áıelge qatysty qylmystyq is qozǵalǵanyn jazǵan bolatynbyz.