2700 grant ıegeri L. Gýmılev atyndaǵy EUÝ-de bilim alady
ASTANA. QazAqparat - Bıyl L.N. Gýmılev atyndaǵy Eýrazııa ulttyq ýnıversıtetine 2700 oryn bólindi, paıyzdyq kórsetkishpen alǵanda qazaq jáne orys bólimderi boıynsha 70:30 quraıdy.
499 «Altyn belgi» ıegerleri men 231 halyqaralyq, respýblıkalyq jáne prezıdenttik olımpıadalar, ǵylymı jáne sporttyq jarys (el boıynsha eń jaqsy kórsetkish) jeńimpazdary Astana tórindegi ulttyq joǵary oqý ornynda bilim alatyn boldy, dep habarlaıdy oqý ornynyń baspasóz qyzmeti.
Oǵan qosa, Eýrazııa ulttyq ýnıversıtetin 254 avtonomdy bilim berý uıymdarynyń túlekteri men 1307 bilim berý grantyn alýǵa artyqshylyq quqyǵy joq tulǵalar tańdady.
Grantqa aýyldyq kvota boıynsha túskender sany 362 adamdy qurady. Jetim balalar men ata-anasynyń qamqorlyǵynsyz qalǵan balalar 33, І jáne ІІ toptaǵy múgedekterge, bala kezinen múgedekterge, múgedek balalar úshin 12 oryn bólingen. Sonymen qatar granttyqtardyń ishinde qazaq dıasporasynyń 30 ókili de bar.
EUÝ-ǵa tıesili memlekettik bilim berý grant sanynyń kóbisi tehnıkalyq jáne tehnologııalyq mamandyqtar jalpy grant sanynyń 68% quraıdy. Respýblıka kóleminde alǵanda bul kórsetkish memlekettiń tehnıkalyq ári tehnologııalyq mamandyqtarǵa bólgen grant sandarynyń 14 paıyzyn quraıdy, bul salystyrmaly túrde alǵanda eń joǵary kórsetkish bolyp sanalady.
L.N. Gýmılev atyndaǵy EUÝ Údemeli ındýstrıaldy-ınnovatsııalyq damý memlekettik baǵdarlamasy - 2 oryndaýynyń sheńberinde úkimettik sheshimniń negizinde 10 bazalyq joǵary oqý oryndary tizimine kiredi jáne «Qurylys materıaldaryn, buıymdaryn jáne konstrýktsııasyn óndirý», «Ǵaryshtyq tehnıka men tehnologııalar» mamandyqtary boıynsha bolashaq mamandardy daıarlaýda atsalysyp keledi.
Joǵary oqý oryn basshylyǵy bıyl stýdenttik jastardyń sapalyq quramyna da erekshe kóńil bóldi. Quqyqtaný, halyqaralyq quqyq, halyqaralyq qatynastar, ekonomıka, qarjy, esep jáne aýdıt, menedjment mamandyqtary boıynsha ótý upaıy 70-ten 80 ballǵa deıin ósti.
