270 emshara kabıneti óz qyzmetin erikti túrde toqtatty
ASTANA.KAZINFORM - Qazaqstan Densaýlyq saqtaý mınıstrligi zańsyz medıtsınalyq qyzmet kórsetý faktilerin jáne medıtsınalyq kómek kórsetý kezindegi standarttardyń buzylýyn anyqtaý maqsatynda respýblıka boıynsha jeke emshara kabınetterine tekserý jumystaryn jalǵastyryp jatyr.
Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti júrgizgen monıtorıngtiń barysynda 1900 jeke emshara kabınetiniń 408-i tıisti lıtsenzııasyz medıtsınalyq qyzmet kórsetkeni anyqtaldy.
Ýákiletti organ júrgizgen tekserýlerdiń nátıjesinde 270 emshara kabıneti óz qyzmetin erikti túrde toqtatty; birqatar sýbektiler qyzmetin zańdastyrýǵa daıyn ekenin bildirip, ruqsat berý qujattaryn rásimdeýge kiristi; 116 nysanǵa qatysty jospardan tys tekserýler bastaldy.
Aıaqtalǵan tekserý is-sharalarynyń qorytyndysy boıynsha mynadaı júıeli buzýshylyqtar anyqtaldy:
• medıtsınalyq qyzmetti lıtsenzııasyz júzege asyrý;
• sanıtarııalyq-epıdemıologııalyq talaptardy saqtamaý;
• dárilik zattardy saqtaý sharttarynyń buzylýy;
• bilikti medıtsınalyq personaldyń bolmaýy;
• shuǵyl medıtsınalyq kómek kórsetýge arnalǵan qajetti jıyntyqtardyń bolmaýy.
Baqylaý is-sharalarynyń nátıjeleri boıynsha:
• 147 ákimshilik hattama toltyryldy;
• jalpy somasy 16 mln teńgeden astam aıyppul salyndy.
Densaýlyq saqtaý mınıstrligi qabyldanyp jatqan sharalar eń aldymen patsıentterdiń densaýlyǵy men qaýipsizdigin saqtaýǵa, medıtsınalyq qyzmetterdiń sapasyn qamtamasyz etýge jáne zańnama talaptaryn saqtaýǵa baǵyttalǵanyn atap ótti.
Aıta keteıik, eki adamnyń óliminen keıin emshara kabınetterine tekseris bastaldy.
