27 jyldan keıingi kezdesý: «Qaırat» «Zenıtti» jeńe ala ma

Joldastyq kezdesý desek te qos komanda úshin bul oıynnyń aıryqsha máni bar. Óıtkeni, eki ujym kezindegi KSRO birinshiliginen keıin bir-birimen sheberlik baıqasyp kórgen joq. Sondyqtan kezinde tartysqa túsken komandalarǵa bul kezdesýdiń aıryqsha máni bar.

Búginde «Zenıt» Reseı birinshiliginde úzdik komandalar qatarynda sanalady. Olardyń qarjylyq qýaty óte joǵary. Álemniń aldyńǵy qatarly quramalarynda dop tebetin keıbir fýtbolshylar qazir «Zenıttiń» quramynda júr. Máselen, Argentına quramasynyń oıynshylary Emanýel Mammana, Leandro Paredes, Matıas Kranevıtter, Sebatıan Drıýssı ekvadorlyq Krıstıan Noboa, portýgaldyq Lýısh Netý, serbııalyq Branıslav Ivanovıch qazir atalmysh reseılik klýbtyń namysyn qorǵaıdy. Sondaı-aq, komandada Reseı quramasy sapynda oıyn kórsetetin fýtbolshylar sany basym. Sondyqtan bul oıyn «Qaırat» úshin úlken synaq. Aıta keterligi, qazir «Qaırat» namysyn qorǵap júrgen Andreı Arshavın kezinde Sankt-Peterbýrg klýbynda jarqyldap kózge túsken edi. Endeshe, jankúıerler bul kezdesýdi asyǵa kútip otyrǵany anyq. 

Keńes odaǵy birinshiliginde «Qaırat» pen «Zenıt» 57 márte kezdesken. Bul oıyndarda «Zenıt» 20 márte jeńiske jetse, 17-i «Qaırattyń» basymdyǵymen aıaqtalǵan. Al 20 kezdesýde teń nátıje tirkeldi. Qos komanda sońǵy oıyndaryn 1991 jyldyń 27 qazanynda Almaty qalasynda ótkizgen. Bul oıynda almatylyqtar 1:0 esebimen jeńiske jetken. Sol jyldary eki komanda da birinshi lıgada oıyn kórsetetin.

Búginde «Qaırat» ta elimizdiń myqty klýbynyń qatarynda sanalady. Eki márte el chempıony (1992, 2004) atandy. Sońǵy bes jyldan beri úzdik úshtikten tómen túsip kórgen emes. Eýrokýbok oıyndaryna turaqty túrde qatysyp keledi.

Bıylǵy birinshilikte komandanyń bas bapkeri qyzmetine Sergeı Semak keldi. El birinshiliginde 5 týrdan keıin «Zenıt» 4 márte jeńiske jetip, bir ret teń tústi. Osylaısha, kestede kósh bastap tur. Al Qazaqstan birinshiliginde «Qaırat» ekinshi orynǵa jaıǵasqan. Basty qarsylasy - elordalyq «Astana» klýbynan nebári úsh upaı artqa qalǵan.

Qazir qos komandanyń da úzdik oıynshylary óz eliniń ulttyq quramasy sapynda Ulttar lıgasyna qatysýda. Sondyqtan búgingi kezdesýde tájirıbeli oıynshylarmen birge jastar da jasyl alańǵa shyǵyp qalýy múmkin.

«Zenıt» pen «Qaırattyń» búgingi oıyny Sankt-Peterbýrg qalasyndaǵy «Sankt-Peterbýrg» arenasynda bolady. Oıyn Astana ýaqytymen 21.00-de bastalady. Oıyndy Match TV jáne «Qazsport» telearnalarynan kórýge bolady. 

Aıta keteıik, «Qaırattyń» bas bapkeriniń birinshi assıstenti, belgili qazaqstandyq fýtbolshy Andreı Karpovıch «Zenıtke» qarsy oıyn qyzyqty ári paıdaly bolatynyna senim bildirgen bolatyn.

Foto: fckairat.com