27 jastaǵy saıahatshy Maǵjan Saǵymbaev jer sharyn velosıpedpen aralap shyǵyp, Almatyǵa oraldy

Respýblıka alańynda ony týǵan-týystary, áýesqoı velosıpedshiler, osy saıahatqa demeýshilik jasaǵan «Qazaq geografııalyq qoǵamy» qoǵamdyq birlestiginiń ókilderi jáne jýrnalıster qaýymy zor qýanyshpen qarsy aldy. Aldyna tartylǵan qyzyl lentany velosıpedimen «qıyp» ótken Maǵjan: «Men oraldym!» - dep qýana eki qolyn kókke kóterdi. Sol-aq eken, ata-anasy, týǵan-týystary qýanyshtan kózderine jas alyp, ony qushaqtaı bastady.

Jýrnalısterge bergen suhbatynda Maǵjan saıahattyń ońaıǵa soqpaǵanyn aıtty.

«Bir jyl ishinde 4 qurlyqty, 22 eldi aralap shyqtym. Kúnine aýa raıyna baılanysty 100 shaqyrymnan 200 shaqyrymǵa deıin júrip otyrdym. Jolda jergilikti turǵyndardyń úıine, arzan qonaq úılerge, gesthaýstarǵa, keıde palatkaǵa túnep júrdim. Kúnine 5 dollardan 10 dollarǵa deıin jumsadym»6 - dedi Maǵjan.

Ol sonymen qatar jolda ár túrli qıyn jaǵdaılarǵa tap bolǵanyn da jasyrmady.

«Túrkimenstanda 43 gradýstyq ystyqta esimnen talyp qala jazdadym. Barselonada kúndiz velosıpedimdi shynjyrlap, qonaq úıge kirip-shyqqanym sol edi, 10 mınýtta ótken joq, velosıpedimdi urlap ketipti. Sodan, «Almaty Broteam» velokomandasy kómektesip maǵan aqsha saldy. Men ol aqshaǵa velosıped satyp aldym. Keıin, jol-jónekeı onyń dóńgelegin, shynjyryn aýystyrdym. Al Kolýmbııada abaısyzda qulap, qabyrǵamdy syndyryp ala jazdadym. Qytaıda jolda júrip kele jatyp ıtke talandym. Tıbettik mastıf deıtin eki ıt artymnan qýyp jetip eki jambasyma jarmasty. Qudaı jarylqap, jaraqftym aýyr bolǵan joq. Aman-esen elge oraldym» - dedi Maǵjan.

Sondaı- aq, Maǵjannyń aıtýynsha, barlyq elde ony jergilikti halyq ystyq yqylaspen qarsy alǵan. Qazaqstan týraly kóp surapty.

«Men saıahattaý barysynda úsh ret ushaqqa otyrdym. Barselonadan Kolýmbııaǵa, Ekvadordan Avstralııaǵa, odan Taılandqa ushtym. Qalǵan qashyqtyqtardyń barlyǵyn velosıpedpen júrip óttim. Barǵan jerlerimde adamdar meni ystyq yqylaspen qarsy aldy. Úılerine qonaq bolýǵa, dám tatýǵa shaqyrdy. Qazaqstan týraly kóp suraqtar qoıdy. Men elimiz jaıly kóp áńgimeledim. Bizdiń eldi bilmeıtinder kóp eken. Keı jerlerde adamdardyń maǵan týra bir jer betinen quryp bara jatqan janýarǵa qaraǵandaı tańǵala qaraǵan kezderi boldy. Jalpy, jergilikti halyq jyly lebizben qarsy aldy. Ásirese ırandyqtardyń maǵan degen iltıpaty erekshe boldy. Men bul saıahattan kóp nárse úırendim, til úırendim. Jergilikti halyqtardyń salt-dástúrimen, mádenıetimen tanystym. Men úshin bul úlken tájirıbe», - dedi M. Saǵymbaev.

Aıta ketelik, Maǵjan Saǵymbaev bul saıahatqa ótken jyly 1 mamyrda Almaty qalasyndaǵy Respýblıka alańynan qazaq jastary arasynda tuńǵysh ret jer sharyn aralap shyǵýǵa shyqqan bolatyn.

Maǵjan endi aldaǵy ýaqytta týrızm salasynda óziniń ekskýrsııalyq qyzmetin odan ári jalǵastyrmaq nıette.