27 jastaǵy qazaqstandyq ǵalym jańa ólsheý qurylǵysyn oılap tapty

ASTANA. KAZINFORM – Elimizde alǵash ret aýa ylǵaldylyǵyn ólsheý tehnologııasy jasaldy. Ony daıyndap shyǵarǵan nebári 27 jastaǵy jas ǵalym Asylbek Jumaǵalı. «QazStandart» RMK bas mamany «Búgin LIVE» baǵdarlamasyna onlaın baılanysqa shyǵyp, óziniń jańa tehnologııasy týraly baıandady. 

— Bizdiń mekemede eń joǵarǵy dáldiktegi etalondar jumys isteıdi. Bizdegi jetildirilgen etalon - shyq pen qyraý núktesiniń temperatýrasy boıynsha etalon bolyp esepteledi. Onyń negizgi ólsheý úrdisi fýndamentaldy ádiste jasalǵan. Etalonnyń negizgi elementi — qanyqtyrǵysh. Qanyqtyrǵysh shaǵyn kólemdi, 4 lıtrlik suıyq termostatqa ornalastyrylady. Termostattyń temperatýrasyn qanyqtyrǵyshtyń temperatýrasymen birdeı qylyp, joǵarǵy dáldikte nátıjesin alamyz, — deıdi ǵalym.

Asylbek Jumaǵalı ózi jasap shyǵarǵan aýa ylǵaldylyǵyn ólsheý tehnologııasyn patenttep te úlgeripti.

— Qanyqtyrǵyshtyń paıdaly model patentin ótken jyly aldyq. Biraq patent alǵanymen, onyń dáldik kórsetkishterin dáleldeý úshin halyqaralyq salystyrý júrgizý kerek. Al onyń nátıjesi bir aı buryn ǵana shyqty, — deıdi ol.

Aıta keteıik, jýyrda Qazaqstan men Qytaıdyń birlesken ǵylym jáne tehnologııa mektebi ashylmaq.