27 jas maman esh tamyr-tanyssyz Ulttyq bankte qyzmetke taǵaıyndaldy
ALMATY. QazAqparat - Qazaqstan Ulttyq banki elimizdiń basty qarjy ınstıtýtynda jumys isteý úshin jas mamandardy jáne joǵary oqý oryndarynyń túlekterin izdestirý jónindegi naýqan qorytyndysyn shyǵardy, dep habarlaıdy QazAqparat tilshisi banktiń baspasóz qyzmetine silteme jasaı otyryp.
«Úmitkerlerden ótinishter 2016 jylǵy 20 qyrkúıek pen 20 qazan aralyǵynda qabyldandy. Qaraýǵa 960 túıindeme tústi. Úmitkerlerdi irikteý protsesi birneshe aıǵa sozyldy. Tıisti bilimi, jumys tájirıbesi bar jáne Ulttyq banktiń qyzmetkeri bolǵysy keletin úmitkerler irikteýdiń birneshe kezeńinen ótti. Nátıjesinde, 48 úmitker iriktelip, 27 adam laýazymdy qyzmetke taǵaıyndaýǵa usynyldy, 21 adam Ulttyq banktiń kadr rezervine alyndy», - dedi bank tóraǵasy Danııar Aqyshev.
D. Aqyshevtyń aıtýynsha, bank budan keıin de bul naýqandy ótkizýdi jalǵastyrady. Ol týraly aqparat Ulttyq banktiń saıtynda, sondaı-aq áleýmettik jelilerdegi resmı akkaýnttarynda jarııalanatyn bolady.
Aıta keteıik, bul naýqannyń bastalǵany týraly Qazaqstan Ulttyq bankiniń tóraǵasy Danııar Aqyshev 2016 jylǵy 20 qyrkúıektegi onlaın-konferentsııada málimdegen bolatyn.
