27 mln teńge shyǵyn: Ulytaý oblysynda qarjylyq pıramıda uıymdastyrǵan azamat sottaldy

JEZQAZǴAN. KAZINFORM — Jezqazǵan qalalyq soty qarjylyq pıramıda uıymdastyryp, 22 azamatqa jalpy somasy 27 mln teńge shyǵyn keltirgen úshin qala turǵynyn kináli dep tanydy. Bul týraly Ulytaý oblysy prokýratýrasy málim etti. 

— Ótken jyldyń naýryz ben jeltoqsan aılary aralyǵynda ol kompanııa keńsesinde kezdesýler ótkizip, jańa qatysýshylardy tirkeýmen, kompanııa júıesinde akkaýnttar qurýmen jáne «Telegram» messendjeri arqyly úgit materıaldaryn taratýmen aınalysqan, — delingen habarlamada.

Atalǵan qyzmet azamattardy elektrondy valıýtaǵa ınvestıtsııa salý arqyly syılyqqa bonýs alasyń degen jeleýmen júıege tartyp otyrǵan.

Sot úkimimen kináli adamǵa 5 jyl bas bostandyǵyn aıyrý jazasy taǵaıyndaldy.

Úkim zańdy kúshine engen joq.

Prokýratýra azamattarǵa qyraǵy bolýdy, kompanııalardyń qarjylyq qyzmetin jáne olardyń tıisti lıtsenzııalarynyń bolýyn tekserýdi, sondaı-aq qarjylyq pıramıdalarynyń belgileri bar shemalarǵa qatyspaýdy eskertedi.

Eske sala keteıik, buǵan deıin Almatyda «Matic Basket» qarjy pıramıdasy 2 myń adamnyń 80 mln teńgesin qoldy etkenin jazǵan edik. 

Al, Qarjylyq monıtorıng agenttigi Shymkent qalasy boıynsha departamenti «QazMunaıGaz Invest» qarjy pıramıdasynyń zańsyz qyzmetin toqtatqan edi. «QazMunaıGaz» ataýyn jamylǵan pıramıda 15 kúnde 50% paıda ýáde etken bolatyn.