2,7 mln gektar alqaptaǵy astyq qaıta kóktep ketken
Aýyl sharýashylyǵy mınıstri Aıdarbek Saparov kúz basyndaǵy tolassyz jaýynnan dıqandarǵa kelgen zardaptyń kólemin atady, dep habarlaıdy QazAqparat.
«Negizgi astyq egetin aımaqtarda 3 aptadan astam ýaqytqa sozylǵan uzaq jaýyn-shashyn óziniń kesirin kórsetti. Bul jańa túsimniń sapasynyń nasharlaýyna, astyqtyń ónip ketýine, joǵary ylǵaldylyq pen refaktsııaǵa jáne dándi daqyldardyń tómen ónimdiligine ákeldi», - dedi ol Úkimet otyrysynda.
Sondaı-aq, mınıstr aýa raıynan zardap shekken óńirlerde shyǵynnyń aýqymyn aıqyndaý úshin jumys komıssııalary qurylǵanyn atap ótti.
«Jumys komıssııalary elimizdiń zardap shekken aımaqtaryna baryp, egin jınaý jumystarynyń barysyna taldaý júrgizdi. Ákimdikterdiń derekteri boıynsha 2,7 mln gektarda nemese 15% alańda dánniń ónip jatqany baıqalady. Ortasha ónimdilik ótken jylǵy deńgeıden gektarynan 2,7 tsentnerge tómen ekendigin aıta ketý kerek. Qazirgi tańda oblystarda barlyq egin jınaý tehnıkasy jappaı egistikterge shyqty, egin jınaý jumystary jalǵasýda», - dedi Aıdarbek Saparov.
