27 maýsym. QazAqparat kúntizbesi
ATAÝLY KÚNDER
Búkilálemdik balyq aýlaý kásibi kúni
1984 jyldyń shilde aıynan bastap Balyq aýlaýdy baqylaý jáne damytý jónindegi halyqaralyq konferentsııanyń sheshimi boıynsha jyl saıyn atalyp ótedi.
Usaq, shaǵyn jáne orta kásiporyndar kúni
Bul kúndi 2017 jyldyń sáýirinde BUU Bas Assambleıasy resmı túrde bekitti. Ondaǵy maqsat – usaq, shaǵyn jáne orta kásiporyndardyń kez kelgen eldiń ekonomıkasyn damytýǵa, sondaı-aq turaqty damý salasyndaǵy maqsattarǵa jetýge qosatyn mańyzdy úlesin atap kórsetý.
ESTE QALAR OQIǴALAR
2005 jyly Dúnıejúzilik keden uıymynyń Keden yntymaqtastyǵy keńesiniń 105-shi jáne 106-shy sessııasynda Qazaqstan Dúnıejúzilik keden uıymy Saıası komıssııasynyń múshesi bolyp saılandy. Dúnıejúzilik keden uıymy Saıası komıssııasy 1978 jyly qurylǵan. Onyń quramyna Dúnıejúzilik keden uıymyna múshe asa belsendi 17 memleket aımaqtyq negizde ekijyldyq merzimge saılanady. Bul uıym búkilálemdik keden júıesiniń qyzmeti men damý máselelerin qarastyrady: halyqaralyq konventsııalardy jańartý jáne engizý, keden isi salasyndaǵy basqa da quqyqtyq amaldardy ázirleıdi.
2006 jyly Almatyda Qazaqstan men Reseı Prezıdentteriniń bastamasymen qurylǵan Eýrazııa damý banki óz jumysyn bastady.
2011 jyly Qazaqstan Respýblıkasynyń Islam konferentsııasy uıymyna tóraǵalyq etýine arnalǵan nomınaldyq quny 1000 teńgelik eskertkish banknota shyqty.
2011 jyly Elordadaǵy Prezıdenttik mádenıet ortalyǵynyń kórmeler zalynda Islam tarıhy, óneri jáne mádenıeti zertteý ortalyǵynyń uıymdastyrýymen kallıgrafııa sheberleriniń kórmesi ashyldy. Kórmege qoıylǵan 30-dan astam kallıgrafııalyq jumystyń arasynda túriktiń belgili kallıgrafısteri – Ahmed Qarahısarı, Mahmýd Djalalýddın, Mehmed Ázız, Mehmed Nazıf, t.b. Osman ımperııasy tusynda jazǵan jazbalary bar. Olarda Quran súreleri, hadıster kórinis tapqan.
2012 jyly Nıý-Iorkte BUU Bas hatshysynyń ekonomıkalyq jáne áleýmettik máseleler jónindegi orynbasary Sha Tszýnkan Qazaqstan Respýblıkasynyń delegatsııasyna «For the Second Best Experience on E-Participation Worldwide» jazýy qashalǵan nagradany tabys etti. «E-qatysý» (E-participation) ındeksi boıynsha birinshi oryndy Ońtústik Koreıa men Nıderland, úshinshi oryndy AQSh pen Ulybrıtanııa aldy. Qazaqstan men Sıngapýr ekinshi oryndy bólisti. Bul ındeks azamattardyń úkimetpen onlaın-baılanysynyń (blog, áleýmettik jeliler, ınternet-konferentsııalar arqyly) múmkindikterin saralaý arqyly anyqtalady.
2013 jyly Almaty oblysynda Qytaıdan kelgen eki qandas QR Prezıdentiniń týǵan kúni qurmetine kıizden eń úlken kilem-syrmaq basty.
2013 jyly Qarǵaly aýdandyq aýrýhanasynyń hırýrgy Álııa Qankeldiniń aty «Úzdik adamdar» entsıklopedııasynyń «Tulǵalar» aıdaryna jazyldy. «Úzdik adamdar» halyqaralyq entsıklopedııasy Qazaqstan, Belarýs, Reseı, Ýkraına elderiniń eńbegi sińgen, qurmetti tulǵalary, óz kásibiniń tabysqa jetken sheberleri týraly jazady.
2015 jyly Beıjińde «Tszıntaı» mýzeıinde «Abaı oqýlary» ótti jáne uly aqyn, oıshyl Abaıdyń 170 jyldyǵyna oraı «Belgisiz Qazaqstan» fotokórmesi ashyldy.
2016 jyly ýltramarafon-adam Dın Karnazes Qazaqstan Respýblıkasy men AQSh arasyndaǵy dostyq qarym-qatynastyń 25 jyldyǵyna oraı, Jibek jolynyń boıymen 525 shaqyrym júgirip ótti. Dın Karnazes uzaq qashyqtyqqa júgiretin álemdegi eń tanymal sportshylardyń qatarynda.
2016 jyly Elordadaǵy Nazarbaev Zııatkerlik mektebi (halyqaralyq bakalavrıat) Halyqaralyq mektepter keńesiniń (CIS) akkredıtteý jónindegi kýáligine ıe boldy.
2016 jyly Ankara qalasyndaǵy Gazı ýnıversıtetiniń dotsenti, túrkitanýshy ǵalym Djemıle Kynadjı 1925-1991 jyldar kezeńindegi tanymal qazaq jazýshylarynyń shyǵarmashylyǵyn zertteý qorytyndysy boıynsha monografııasyn jarııalady. Dj. Kynadjynyń «Qazaq ádebıetindegi bolmys pen birdeılik» dep atalatyn kitabynda M. Áýezov, J. Aımaýytov, S. Seıfýllın, B. Maılın, S. Erýbaev, S. Muqanov, Ǵ. Músirepov, Á. Kekilbaev jáne M. Maǵaýın sekildi qazaq jazýshylarynyń romandaryna taldaý jasalǵan.
2018 jyly Á. Qasteev atyndaǵy Memlekettik óner mýzeıi Jibek jolyndaǵy beıneleý ónerleri mýzeıleriniń Halyqaralyq alıansyna kirdi. Alıans «Bir beldeý, bir jol» elderi arasyndaǵy gýmanıtarlyq yntymaqtastyqty nyǵaıtýdyń mańyzdy tuǵyry boldy. Alıans Qytaı astanasynda quryldy. Onyń ashylý rásimine 18 eldiń mýzeıleriniń qyzmetkerleri qatysty.
2018 jyly Qazaqstanda jolbarystar sanyn arttyrýǵa arnalǵan Іle-Balqash rezervaty resmı túrde quryldy. Rezervat 415 myń gektar aýdandy alyp jatyr. Ol Qazaqstannyń altynshy qoryǵy boldy.
2021 jyly Qaraǵandy qalasyndaǵy Respýblıka dańǵyly boıyndaǵy №4 úıge Qazaqstan Respýblıkasynyń eńbek sińirgen qaıratkeri, Qazaqstannyń Qurmetti jýrnalısi Maǵaýııa Sembaıdyń qurmetine memorıaldyq taqta ornatyldy. Jýrnalıst bul úıde qyryq jyldan astam turypty.
Maǵaýııa Sembaı – S. Kırov atyndaǵy QazMÝ-dyń jýrnalıstıka fakýltetiniń túlegi. Sońǵy 20 jyl boıy «Ortalyq Qazaqstan» gazetiniń bas redaktory boldy. Onyń osy gazettegi jalpy eńbek ótili 40 jyldan asady.
2022 jyly Qaraǵandyda qańtar oqıǵasynda qaza tapqan Ulttyq gvardııa sarbazy Madııar Qaısarovtyń qurmetine eskertkish taqta ashyldy. Eskertkish taqta sarbazdyń turǵan úıiniń qabyrǵasyna ornatyldy.
