27 qyrkúıek. QazAqparat kúntizbesi
27 qyrkúıek, BEISENBІ
Halyqaralyq týrızm kúni
1980 jyly Manılada ótken Búkilálemdik týrıstik uıymdar Bas Assambleıasynyń sheshimimen jyl saıyn atap ótiledi.
Polıak astyrtyn memleketi kúni
Meıramǵa memlekettik mártebe berilgen, biraq ol kúni eshkim demalmaıdy, jumys kúni bolyp esepteledi. Meıram Ekinshi dúnıejúzilik soǵys jyldarynda nemister Polshany okkýpatsııalaǵan kezde qurylǵan Polıak astyrtyn memleketiniń qurmetine 1998 jyly bekitildi.
Meksıkada táýelsizdik úshin soǵystyń aıaqtalǵan kúni
Ataýly kún Meksıka táýelsizdigi úshin 1810 jylǵy 16 qyrkúıekte Idalgo ákeı bastaǵan 11 jyldyq soǵystyń aıaqtalýyna oraı jyl saıyn toılanady.
Google-diń týǵan kúni
Google.com domendik esimi 1997 jylǵy 15 qyrkúıekte, al Google Inc. kompanııasy 1998 jylǵy 4 qyrkúıekte tirkeldi. Alaıda, 2005 jyldan bastap kompanııanyń týǵan kúni resmı túrde 27 qyrkúıekte atap ótiledi.
ESTE QALAR OQIǴALAR
1929 jyly astyq daıyndaý naýqany kezinde Syrdarııa okrýginiń Bostandyq aýdanynyń (qazir Ózbekstanǵa qaraıdy) turǵyndary keńes úkimetiniń aýyr salyq salýyna jáne zombylyq áreketine qarsy qarsylyq kórsetti. Kóterilisti uıymdastyrýshylar T.Musabaev, Ý.Maılybaev boldy, oǵan 500-ge tarta adam qatysty. Berishmolla qystaýynyń qasyndaǵy urysta olarǵa I.Shanybekovtiń basmashylar jasaǵy kómekke keldi. Kóterilisti Memlekettik saıası basqarmanyń jasaqtary kúshpen basty. Kóterilisshilerden 50 adam qazaǵa ushyrady, 2 adam atý jazasyna kesildi, 36-sy - 10 jylǵa sottaldy, jeteýi - 5 jylǵa jer aýdaryldy.
2005 jyly Almatyda eki el arasyndaǵy ekonomıkalyq qatynastardy tereńdetý maqsatynda qurylǵan Qazaqstan-Germanııa kásipkerleri qaýymdastyǵynyń tanystyrylymy boldy. Qaýymdastyqtyń negizgi mindetteri - óz múddeleri men quqyqtaryn qorǵaý.
2005 jyly Almatyda Á.Qasteev atyndaǵy murajaıda kontemporarı art (Qazaqstannyń qazirgi zamanǵy óneri) atty jańa zaly ashyldy. Zalda álemdik deńgeıdegi art-alańdarynda elimizdi kórsetetin barlyq qazaqstandyq avtorlardyń jumystary jınalǵan. Jańa zalda músinder, kartınalar, sýretter qoıylǵan. Avtorlardyń kóptegen jumystarynda Ortalyq Azııanyń áleýmettik-saıası ortasy beınelengen.
2006 jyly Almaty oblysy Іle aýdanyndaǵy Pervomaı kentinde Qazaqstandaǵy alǵashqy ınfýzııalyq eritindiler shyǵaratyn zaýyttyń tanystyrylymy boldy. Infýzııalyq eritindiler strategııalyq mańyzdy dári-dármek qataryna jatady. Olar aýrýhanalarda kún saıyn úlken kólemde paıdalanylady. Sondaı-aq túrli epıdemııalar, tabıǵı jáne tehnogendik sıpattaǵy apattar men soǵys qımyldary kezinde de oǵan degen suranys eselep arta túsedi. Halyqaralyq medıtsınalyq zertteýlerge qaraǵanda bir adamǵa jylyna orta eseppen eki lıtr ınfýzııalyq eritindi kerek. Qazirgi tańda olardyń 90 paıyzy shetelden ákelinedi.
2006 jyly Germanııanyń Baden-Vıýrtemberg jerinde, Valdbrýnn-Mıýlben qalasynda Qazaqstan Elshiligi jergilikti qymyz óndirýshi fermamen birlesip, Germanııadaǵy qazaq dıasporasy men Qazaqstannan kóship barǵan otandastarymyzdyń belsendi atsalysýymen «Qymyzmuryndyq» ótkizdi. Shara aıasynda merekelik qoıylymdar uıymdastyrylyp, qymyz merekesine arnaıy kelgen qonaqtardyń aldynda Keln jáne Bavarııa aımaqtaryndaǵy qazaq dıasporasynyń kórkemónerpaz ártisteri óner kórsetti. Mereke qonaqtary qazaqtyń kıiz úıimen, dombyra aspabymen, ulttyq dastarqan mázirimen jáne Germanııadaǵy qymyz óndirisiniń bastalý tarıhymen, qymyzdyń emdik qasıetterimen tanysty.
2007 jyly Almatyda «Abaı joly» romanynyń orys tilindegi jańa aýdarmasynyń tanystyrylymy bolyp ótti. Qazaqstanda týǵan jáne qazaq ádebıetimen jete tanys, sondaı-aq Ábdijámil Nurpeıisov, Ábish Kekilbaı, Oralhan Bókeı men Tólen Ábdiktiń shyǵarmalaryn sátti aýdaryp, mol tájirıbe jınaqtaǵan esimi álemge áıgili jazýshy Anatolıı Kım bul aýdarmaǵa úlken daıyndyqpen keldi.
2007 jyly Pavlodarda aqyn, qalanyń qurmetti azamaty, aýdarmashy ári dramatýrg Amanjol Shamkenovtiń (1927-2004) qurmetine memorıaldyq taqta ashyldy. Ondaǵan kitap pen poezııalyq jınaqtardyń avtory Amanjol Shamkenov 1927 jyly Pavlodarda dúnıege keldi. Qazaq memlekettiq ýnıversıtetin bitirgen. Onyń «Stýdent syry» atty tuńǵysh jınaǵy 1951 jyly basylyp shyqty. Qazaq KSR Baspa, polıgrafııa jáne kitap saýdasy isteri memlekettik komıteti kórkem ádebıet redaktsııasynda, «Juldyz» jýrnalynda, «Jazýshy» baspasynda jemisti eńbek etti, kóptegen jyldar Qazaqstan jazýshylary odaǵynda balalar ádebıeti sektsııasyna basshylyq etti. Sondaı-aq, ol - «Úndi áýenderi» óleńder toptamasy úshin Djavaharlal Nerý atyndaǵy Halyqaralyq syılyqtyń ıegeri.
2007 jyly Semeıde Qazaqstandaǵy birinshi avtobýs qurastyrý zaýyty - «DAEWOO BUS KAZAKHSTAN» JShS ashyldy.
2010 jyly Jambyl oblysyna eki kúndik jumys sapary barysynda Memleket basshysy Nursultan Nazarbaev Taraz jún óńdeý fabrıkasyndaǵy jańa óndiristi bastap berdi.
2010 jyly Astanada «Qazaqstandaǵy Latyn Amerıkasy aptalyǵy» І halyqaralyq forýmy ótti.
2011 jyly rejısser Ádilhan Erjanovtyń «Rıeltor» fılmi «Kınoshok-2011» festıvalinde arnaıy júldege ıe boldy.
2012 jyly Almatyda Qaıym Muhamedhanovtyń shyǵarmalarynyń onynshy kitaby jaryq kórdi. Onda Q.Muhamedhanovtyń «Abaıdyń ádebı mektebi» dıssertatsııasyn qorǵaý stenogrammasy alǵash ret jarııalandy.
2012 jyly Aqsý qalasynda Imanjúsip Qutpanuly (1863-1929) atyndaǵy sport saraıy ashyldy. Sondaı-aq bul kúni qazaqtyń belgili aqyny, jýrnalıst, satırık ári qoǵam qaıratkeri Sábıt Dónentaevtyń (1894-1933) eskertkishi ashylyp, qalalyq mádenıet saraıy men alańyna aqynnyń esimi berildi.
Aqsýdaǵy eskertkishtiń avtory - belgili músinshi Toqtar Ermekov.
2012 jyly Pragada Qazaqstan Respýblıkasynyń Cheh Respýblıkasyndaǵy elshiliginiń qoldaýymen «Elim-aı» qazaq mádenı ortalyǵy uıymdastyrǵan Qazaqstan Mádenıet kúnderi bastaldy.
2012 jyly L.N. Gýmılev atyndaǵy Eýrazııa ulttyq ýnıversıtetiniń Qajymuqan Muńaıtpasov kóshesi 11-úıde ornalasqan korpýsynyń shatyryna Germanııada jasalǵan kún elektr stantsııasy ornatyldy.
2012 jyly «Eır Astananyń» áýeparkin tolyqtyrǵan jańa Embraer 190 áýe laıneri Qazaqstan aýmaǵynda jáne kórshi elderge usha bastady. Áýe laınerine áıgili qazaq kúıshisi, kompozıtor Dına Nurpeıisovanyń esimi berildi.
2013 jyly Monte-Karloda Qazaqstan Respýblıkasynyń Prezıdenti Nursultan Nazarbaevtyń Monako knıazdigine resmı sapary aıasynda «Monako-Qazaqstan» bıznes-forýmy boldy.
Shara barysynda Qazaqstan men Monako arasynda Birlesken iskerlik keńes qurý týraly kelisimge, sondaı-aq kóptegen basqa da qujattarǵa qol qoıyldy. Budan bólek, bıznes-forým aıasynda Qazaqstan jáne Monako jaıly fılmder qoıylyp, eki el arasyndaǵy saýda-ekonomıkalyq baılanystardy damytý perspektıvalary talqylandy.
2013 jyly Qazaqstanda Internettiń qazaqtildi segmentin damytýǵa qosqan úlesi úshin tuńǵysh ret ulttyq ınternet-syılyq taǵaıyndaý týraly sheshim qabyldandy. Syılyqty Ulttyq ınternet qaýymdastyǵy taǵaıyndady.
2013 jyly QR Prezıdenti Nursultan Nazarbaevtyń Monako Knıazdyǵyna resmı sapary aýqymynda memlekettik nargradalar almasý resmı rásimi bolyp ótti.
Memleket basshysy Áýlıe Karl (Sharl) Ordeni Kresimen marapattaldy. Bul orden - Monako Knıazdyǵynyń joǵary memlekettik nagradasy. Ony Knıaz Karl (Sharl) ІІІ taǵaıyndaǵan.
Monako Knıazy Alber ІІ QR joǵary memlekettik nagradasy - «Dostyq» ordenimen marapattaldy. «Dostyq» ordenimen tulǵalar qoǵamdaǵy ózara kelisimdi saqtaýdaǵy jemisti jumysy, halyqtar arasynda beıbitshilikti, dostyq pen yntymaqtastyqty nyǵaıtýǵa sińirgen eńbegi úshin marapattalady.
2013 jyly Almatyda «Olımpıonık» áleýmettik qorynyń ókilderi «Dos-Muqasan» tobyna arnalǵan eskertkish otyrǵysh ornatý jobasyn bastaý týraly jarııalady.
2014 jyly Atyraýda jylyna 100 tonna bekire balyǵy men 1 tonna qara ýyldyryq óndire alatyn balyq ónerkásibi kesheni ashyldy. Jobanyń jalpy quny - 5 mln 728 myń dollardy qurady.
2014 jyly L.N. Gýmılev atyndaǵy Eýrazııa ulttyq ýnıversıtetinde Qazaqstan Bilim berý tarıhy mýzeıi ashyldy.
Mýzeıde dańqty aǵartýshylarǵa qatysty sırek qujattar men buıymdar, sondaı-aq fotosýretter, latyn qarpindegi basylymdar, arab tilinde jazylǵan qoljazbalar jınalǵan.
2014 jyly Qaraǵandy oblysynyń Ulytaý aýdanynda «Ulytaý - uly mekenim» mádenı forýmy ótti.
2015 jyly Qazaqstan Respýblıkasynyń Prezıdenti Nursultan Nazarbaev BUU-nyń 2015 jyldan keıingi damý kezeńine arnalǵan kún tártibin qabyldaý jónindegi sammıtke qatysty. Sammıt barysynda 2015 jylǵa deıingi damýdyń negizgi maqsattary men mindetteri kórsetilgen Myńjyldyq deklaratsııasyn oryndaý jónindegi sharalar nátıjesi talqylandy. Sondaı-aq sharaǵa qatysýshylar 2015 jyldan keıingi kezeńge arnalǵan damý salasynyń kún tártibin qabyldady.
Jınalǵandarǵa sóz arnaǵan Qazaqstan Prezıdenti bizdiń elimiz Myńjyldyq damýdyń segiz maqsatyn júzege asyrý isinde aıtarlyqtaı ilgerileýge qol jetkizgenin aıtty. Atap aıtqanda, Nursultan Nazarbaev Qazaqstan memlekettiliktiń negizin nyǵaıtyp, azamattyq qoǵamnyń damýy úshin jaǵdaı jasaǵanyna nazar aýdardy.
2015 jyly BUU Bas Assambleıasynyń 70-sessııasyna qatysý úshin AQSh-qa barǵan Qazaqstan Prezıdenti Nursultan Nazarbaevty «Bolashaq» stıpendııasy boıynsha AQSh joǵary oqý oryndarynda oqyp júrgen qazaqstandyq stýdentter qarsy aldy. Olardyń arasynda Batyrhan Shúkenovtiń Amerıkada bilim alyp jatqan uly Maqsut ta boldy. Ol Nursultan Nazarbaevqa ákesiniń ánder jınaǵyn syıǵa tartty.
2016 jyly Almatyda Bıbigúl Tólegenova atyndaǵy VIII halyqaralyq vokalıster konkýrsynyń jeńimpazdary anyqtaldy. Oǵan elimizdiń túkpir-túkpirinen jáne shetelderden kelgen opera janrynyń jas talanttary qatysty.
Konkýrstyń bas júldesin almatylyq Rasul Jarmaǵambetov jeńip aldy. Oǵan 3,9 mln teńge kóleminde aqshalaı syılyq berildi.
2017 jyly Astanada Qazaqstan-Koreıa dostastyq baǵynyń saltanatty ashylýy ótti.