27 eldiń matematıkterin basyp ozǵan astanalyq oqýshyǵa planshet syılandy
ASTANA. QazAqparat - Astana qalasy Bilim basqarmasynyń basshysy Qasymhan Senǵazıev balalar arasynda ótken Memoriad Las-Vegas 2016 (WORLD KIDS CUP) olımpıadasynyń jeńimpazy, 27 elden kelgen qarsylastaryn basyp ozǵan Mádı Erdáýletti quttyqtady, dep habarlady QazAqparatqa elordanyń Bilim basqarmasynan.
Mádı Erdáýlet Astana qalasynyń №54 mektep-lıtseıiniń 4-synybynda oqıdy. Oǵan Bilim basqarmasy atynan planshet jáne «Astana» kitaby tabys etildi.
Eske salaıyq, Memoriad 2016 halyqaralyq zııatkerlik olımpıadasy Las-Vegasta ótti. Mádı Erdáýlet «Mentaldy arıfmetıka megasy» boıynsha ІІ Respýblıkalyq olımpıadasynyń jeńimpazy atanyp, 2016 jylǵy maýsymda ótken olımpıadaǵa joldama utyp alǵan bolatyn.
Mádımen birge komandada Almatydan Marǵulan Baıjaqyp (jalpy esepte onynshy orynda), Stepnogordan Ázız Kamelıden (21-shi) jáne Astanadan Dalıla Saqanov boldy.
Memoriad - esepti oısha shyǵarý jáne jyldam oqý boıynsha dúnıejúzilik olımpıada. Ol osyndaı jarystarǵa arnalǵan álemdegi jalǵyz platforma.
Álemniń 148 elinde tirkelgen. Olımpıada tórt jylda bir ret ótedi.
