27 eldiń basshylary EO-dan Ulybrıtanııanyń shyǵýy eskerilgen damý josparyn daıyndaýǵa kelisti
ASTANA. QazAqparat - Eýroodaqqa múshe 27 eldiń jetekshileri aldaǵy jarty jyl ishinde birlestik quramynan Ulybrıtanııanyń shyǵý múmkindigi eskerilgen damý josparyn daıyndaýǵa kelisti.
Bul sheshim Slovakııa astanasy Bratıslavada ótken beıresmı sammıt qorytyndysy boıynsha qabyldanǵan. Eýroodaq damýynyń jol kartasynda zańsyz kóshi-qon máselesi men qaýipsizidik salasyndaǵy yntymaqtastyqty kúsheıtýge erekshe nazar aýdarylady. Sondaı-aq ishki naryqty nyǵaıtyp, ınvestıtsııalardy arttyrý da josparda bar. Aıta ketken jón, Eýroodaq sammıti alǵash ret Ulybrıtanııa ókilderiniń qatysýynsyz ótti. 23 maýsymdaǵy referendým qorytyndysy boıynsha, brıtandyqtar odaq quramynan shyǵý úshin daýys bergen bolatyn. Donald Týsk, Eýropalyq odaqtyń tóraǵasy: - Biz Eýropadaǵy qazirgi saıası jaǵdaıdy saraladyq. Búginde mıllıondaǵan eýropalyqtyń ózin qaýipsiz sezinbeıtini ras. Olar kóshi-qon, lańkestik jáne áleýmettik-ekonomıkalyq damý máselesine qatysty alańdaýshylyq bildirip otyr. Sol sebepti 27 eldiń ókilderi jumylyp, buǵan deıin jiberilgen qatelikterge boı aldyrmaý úshin barymyzdy salamyz.
