Abaı oblysynyń turǵyndary dárigerlerge 2 kún tegin kórine alady

ASTANA. KAZINFORM – 27-29 sáýir aralyǵynda Abaı oblysynda QR Prezıdenti Іs basqarmasy Medıtsınalyq ortalyǵynyń kúnderi ótedi.

Іs-sharanyń negizgi maqsaty – óńirdiń tájirıbelik densaýlyq saqtaý salasyna ozyq medıtsınalyq tehnologııalardy engizý, kásibı tájirıbe almasý, mamandardyń biliktiligin arttyrý jáne medıtsınalyq uıymdarmen ǵylymı-klınıkalyq yntymaqtastyqty nyǵaıtý.

– Delegatsııa quramyna JCI, ISO, GLP jáne GMP halyqaralyq standarttary boıynsha akkredıttelgen QR PІB Medıtsınalyq ortalyǵy aýrýhanalarynyń dárigerleri endi. Olardyń qatarynda arıtmolog, reabılıtolog, gınekolog, proktolog jáne basqa da mamandar bar. Іs-shara aıasynda oblys turǵyndary úshin tegin konsýltatsııalar jáne hırýrgııalyq aralasýlar uıymdastyrylady. Sonymen qatar medıtsına qyzmetkerlerine arnalǵan dárister, semınarlar jáne tájirıbelik sheberlik klastary ótkiziledi. Qabyldaýǵa jazylý úshin medıtsınalyq uıymdardyń tirkeý bólimderine habarlasý qajet, – delingen habarlamada.

Patsıentterdi qabyldaý kestesi:

27 sáýir kúni «Semeı medıtsına ýnıversıteti» KeAQ gospıtalinde saǵat 09:00-13:00 aralyǵynda arıtmolog Erdan Maıdyrov qabyldaý júrgizedi.

Osy kúni Semeı qalasynyń №1 emhanasynda saǵat 09:00-13:00 aralyǵynda arıtmolog Shalqar Smaǵulov qabyldaıdy.

28 sáýir kúni qabyldaý Semeı qalasynyń №1 emhanasynda jalǵasady: saǵat 09:00-13:00 aralyǵynda arıtmolog Erdan Maıdyrov jumys isteıdi.

Medıtsına mamandarynyń bul sapary Medıtsınalyq ortalyq delegatsııasynyń óńirge alǵashqy sapary barysynda qol qoıylǵan Abaı oblysy ákimdigimen Ózara yntymaqtastyq týraly memorandým aıasynda uıymdastyrylyp otyr.

Aıta keteıik, QR PІB Medıtsınalyq ortalyǵy Qytaımen tsıfrlyq medıtsına boıynsha yntymaqtastyqty keńeıtip keledi.