267 jolaýshysy bar ushaq Antalıa áýejaıyndaǵy radar dińgegine soqtyǵysty
ASTANA. KAZINFORM — Turkish Airlines áýe kompanııasynyń ushaǵy Antalıa áýejaıyna qonǵannan keıin júrý jolaǵynda radar dińgegimen soqtyǵysý saldarynan zaqymdandy, dep habarlaıdy Hurriyet.
Boeing 777 ushaǵy Ystanbul — Antalıa baǵyty boıynsha reıs oryndaǵan.
Antalıa áýejaıyna qonǵannan keıin áýe kemesi júrý jolaǵymen turaq ornyna qaraı bet alǵan. Alaıda ushaq qate júrý jolaǵyna túsip ketken. Sonyń saldarynan áýe qozǵalysyn basqarý júıesine tıesili radıolokatsııalyq dińgekpen soqtyǵysqan.
Turkish Airlines kompanııasynyń málimetinshe, ushaq bortynda 267 jolaýshy bolǵan. Olardyń barlyǵy evakýatsııalandy. Oqıǵa saldarynan bir jolaýshy jeńil jaraqat alǵan.
Sondaı-aq ushaq pen radıolokatsııalyq dińgek zaqymdanǵan.
Oqıǵadan keıin Antalıa áýejaıy shtattyq rejımde jumysyn jalǵastyryp jatyr.
Buǵan deıin Ulybrıtanııada áskerı tikushaq apatqa ushyrap, úsh adam qaza tapqany habarlanǵan bolatyn.
Nazerke Jumabek
