263 iri nysan óreskel ereje buzý jaǵdaıynda paıdalanylýda - TJM

NUR-SULTAN. QazAqparat – Búgin Úkimet otyrysynda QR Tótenshe jaǵdaılar mınıstri ıÝrıı Ilın qurylys kezinde jobalardan aýytqýlarǵa jol berilgen faktilerdi atady, dep habarlaıdy QazAqparat tilshisi.

«Qurylys barysynda nysandar arasyndaǵy belgilengen alshaqtyqtar saqtalmaıdy, órt tehnıkasynyń ótýi úshin kireberister eskerilmeıdi. Bul jaǵda úlken alańdarda órttiń paıda bolý qaýip-qaterine ákep soǵady. Mysaly, Taraz qalasynyń turǵyny 2 jyl boıy onyń úıi men saýda kesheni («Mart Magnat») arasyndaǵy órtke qarsy qashyqtyqty buzý faktisi boıynsha bizge birneshe ret júgingen bolatyn. Bıyldyń ótken kezeńinde ǵana osyndaı 100-ge jýyq ótinish kelip tústi», - dedi mınıstr Úkimet otyrysynda.

Onyń sózine qaraǵanda, kóbinese qurylys kezinde jobalardan aýytqýlarǵa jol beriledi, nátıjesinde nysandar ózgertilmeıtin kemshiliktermen paıdalanylady. Atap aıtqanda, Nur-Sultan qalasynyń «Baqyt Premıým» turǵyn úı kesheninde joba boıynsha 9 qabattyń bolýy eskerilgen, al is júzinde ol 10 qabat salynǵan. Elordanyń Qosshyǵululy kóshesindegi (20, 21-úıler) turǵyn úılerde evakýatsııalyq baspaldaqtar joq.

«Jalpy respýblıka boıynsha óreskel ereje buzý jaǵdaıynda 263 iri nysan paıdalanylýda. Lıtsenzııadan aıyrýǵa deıin tıisti sharalar qabyldaý úshin aqparat ýákiletti organǵa joldandy. Bıyldan bastap Indýstrııa jáne ınfraqurylymdyq damý mınıstrligimen birlesip jobalaý satysynda normalardy saqtaý máselesi sheshildi, órt qaýipsizdigi boıynsha sarapshylar engizildi. Sonymen qatar, qurylys kezinde tehnıkalyq jáne avtorlyq qadaǵalaý qyzmetine baqylaýdy kúsheıtý qajet», - dedi ıÝ. Ilın.

Budan buryn habarlanǵandaı, elimizde 10 myńnan astam úıde órt qaýipsizdigi erejesi buzylǵan.