263,7 mln teńge salyǵyn tóleýden jaltarǵan kásipkerge úkim shyqty
Atyraý oblystyq prokýratýrasynyń baspasóz qyzmetinen málim etkendeı, memlekettik kirister organymen salyq zańnamasynyń saqtalýyna turaqty taldaý júrgiziledi.
«Memleket basshysy bıznes ókilderimen kezdesý ótkizý barysynda iri kompanııalar salyq tóleýden jaltaratyny jáne memleket aktıvterin shetelge zańsyz shyǵaratyny týraly atap ótti. Júrgizilgen taldaý nátıjesinde «BatysTehnoServısez» JShS-niń burynǵy dırektory kommertsııalyq uıymnyń jalǵyz basshysy bola tura, 2018-2019 jyldar aralyǵynda jalǵan shot-faktýralardy paıdalanyp, 263,7 mln teńge somasyna salyq tóleýden jaltarǵany anyqtaldy. Atalǵan zalal oblys prokýratýrasynyń Atyraý oblystyq Memlekettik kirister departamentine joldanǵan talap negizinde rastaldy. Osyǵan baılanysty seriktestik dırektoryna qatysty QR Qylmystyq kodeksiniń 245-babynyń 3-bóligi (Asa iri mólsherde salyq tóleýden jaltarý faktisi) boıynsha sotqa deıingi tergep-tekserý júrgizildi», - dep habarlady prokýratýranyń baspasóz qyzmetinen.
Sot úkimimen kásipker kommertsııalyq uıymdarda 5 jylǵa basshy laýazymdardy atqarý quqyǵynan, sondaı-aq 3 jyl 4 aı merzimge shartty túrde bas bostandyǵynan aıyryldy.
