26–27 shildede Batys Qazaqstan oblysynda «AGROFEST — 2025» festıvali ótedi
ORAL. KAZINFORM — Báıterek aýdanynyń Sulýkól aýylynda 26–27 shilde kúnderi agroónerkásiptik keshen salasyndaǵy mańyzdy oqıǵalardyń biri — «AGROFEST — 2025» festıvali ótedi. Bul shara tórtinshi ret elimizdiń túkpir-túkpirinen jetekshi agroındýstrııa ókilderin jınamaq.
Festıvalge Qazaqstannyń túrli óńirlerinen jáne Reseıdiń shekaralas aımaqtarynan 8 myńnan astam qonaq keledi dep kútiledi. Uıymdastyrýshylar AGROFEST mártebesin aýyl sharýashylyǵy salasyndaǵy eń mańyzdy is-sharalardyń biri retinde taǵy da dáleldeıtin aýqymdy iskerlik jáne mádenı baǵdarlama ázirlep otyr.
— «AGROFEST — 2025» — jaı ǵana festıval emes. Bul — memleket, bıznes, ǵylym jáne aýyl turǵyndary arasyndaǵy dıalogqa arnalǵan biregeı alań. Qatysýshylar ekonomıka, agrarlyq saıasat jáne ornyqty damý máselelerine arnalǵan paneldik pikirtalastar men sektsııalyq sessııalarǵa qatysyp, eginshilik pen mal sharýashylyǵyndaǵy zamanaýı tehnologııalar salasynda tájirıbe almasady. Sondaı-aq agrobıznestiń úzdik ókilderimen, ǵalymdarmen, sarapshylarmen jáne tehnıka óndirýshilerimen birge AÓK-degi trendter men syn-qaterlerdi talqylaý múmkindigi beriledi, — delingen habarlamada.
Festıval aıasynda aýyl sharýashylyǵy mamandyqtary boıynsha chempıonat uıymdastyrylyp, onda aýylsharýashylyq tehnıkasynyń operatorlary, dánekerleýshiler men qasapshylar óz sheberligin kórsetedi.
Іs-sharanyń basty oqıǵalarynyń biri — Batys Qazaqstan oblysynda shyǵarylǵan «Aqbas» iri qara malynyń tuqymy boıynsha chempıonat bolmaq. Qonaqtar elimizdiń túkpir-túkpirindegi fermerlik sharýashylyqtardan ákelingen osy biregeı tuqymnyń eń úzdik ókilderin tamashalaı alady.
AGROFEST tek iskerlik baǵdarlamasymen ǵana emes, jarqyn mádenı sharalarymen de tanymal: kókpar týrnıri — ondaǵan komandany jáne júzdegen jankúıerdi jınaıtyn dástúrli saıys, qazaqstandyq estrada juldyzdarynyń qatysýymen AgroSound mýzykalyq festıvali, ulttyq oıyndar, qolóner aýlasy jáne ulttyq stıldegi sán kórsetilimin qamtıtyn etnostıl kúni.
Festıval qonaqtary úshin elimizdiń túkpir-túkpirinen kelgen fermerlik sharýashylyqtardyń jetistikteri, tehnologııalary jáne ónimderi usynylatyn keń kórme aımaqtary jumys isteıdi. Munda AÓK-tegi jańa ónimdermen tanysyp qana qoımaı, iskerlik baılanystar ornatýǵa da bolady.
Uıymdastyrýshylar Batys Qazaqstan oblysynyń turǵyndary men óńir qonaqtaryn AGROFEST — 2025 sharasyna qatysýǵa shaqyrady.
Barlyq kórme aımaqtaryna kirý tegin.
Eske sala keteıik, byltyr da AGROFEST Batys 2024 festıvali Báıterek aýdany Sulýkól aýylynda ótken bolatyn.