26.06.2026: Atyraýda erekshe kúni neke qııýǵa ótinish 7 ese kóbeıdi
ATYRAÝ. KAZINFORM – Kúntizbedegi erekshe úılesimmen este qalatyn 2026 jyldyń 26 maýsymynda Atyraý oblysynda zańdy nekesin qııýǵa 152 jup ótinish berdi. Bul kórsetkish ádettegi kúndermen salystyrǵanda jeti ese kóp.
Elimiz boıynsha osy kúnge 4 myńnan astam jup neke qııýǵa ótinish tapsyrǵan. Onyń 152-si Atyraý oblysyna tıesili. Ótinishterdiń 91 paıyzy Atyraý qalasynyń AHAT bólimi arqyly qabyldanǵan.
«Azamattarǵa arnalǵan úkimet» memlekettik korporatsııasy» KE AQ Atyraý oblysy boıynsha fılıalynyń AHAT basqarmasynyń basshysy Almagúl Tóremuratovanyń aıtýynsha, sımvolıkalyq kúnge qyzyǵýshylyqtyń joǵary bolýyna baılanysty neke qııýǵa ótinishter sany kúrt kóbeıgen.
– Osyǵan baılanysty neke qııý rásimderin sapaly uıymdastyrý úshin qosymsha is-sharalar qabyldandy. Barlyq ótinish aldyn ala zerdelenip, jas jubaılardyń kelý ýaqyty kezeń-kezeńimen belgilendi. Bul kelýshilerdiń kóp shoǵyrlanýyna jol bermeı, rásimderdiń kedergisiz ótýine múmkindik berdi, – dedi Almagúl Tóremuratova.
Jalpy jyl basynan beri Atyraý oblysynda 1329 jup zańdy nekesin qıǵan.
Buǵan deıin Almaty qalasynda búgin 830 jup neke qııýǵa ótinish bildirgenin jazǵan edik.
